Sýretti túsirgen Erlan OMAR, «EQ»
Reformalardy tolyqqandy júzege asyrý maqsatynda meılinshe muqııat áreket etip, uzaqmerzimdi múddege jumylý qajettiligi basa aıtyldy. Aldymyzda turǵan strategııalyq reformalaýdy tolyqqandy júzege asyrý, memlekettik ınstıtýttardy jańǵyrtý aıasynda Prezıdent ókilettiginiń merzimin 7 jylǵa sozý usynyldy. Atap ótetin tusy, Prezıdenttiń ókilettigi 7 jyl jáne saılaný merzimi bir ret qana, ıaǵnı ekinshi ret saılanýyna tyıym salynbaq. Bul ózgeris qoǵamǵa ne úshin qajet degen suraqtyń týyndaýy tabıǵı zańdylyq. Bul – memlekettik bılikti monopolızasııalaýdyń aldyn alýdyń bir tetigi.
Bul rette Memleket basshysy kezekten tys Prezıdent saılaýy 20 qarashada ótetini týraly Jarlyqqa qol qoıdy jáne osy bastamaǵa baılanysty Qazaqstan halqyna úndeý jasady. Kezekten tys Prezıdent saılaýy – elimizdiń turaqty damýyna úles qosatyn sheshim. Prezıdent Qasym-Jomart Toqaevtyń 2019 jyly qolǵa alǵan bastamalary men konstıtýsııalyq reformalardyń nátıjesinde Qazaqstanda memlekettik-saıası qurylymnyń jańa modeli qalyptasty. Endi kelesi qadam – osy modeldi iske qosý bolmaq. Bul kúrdeli, jaýapty qadam Konstıtýsııaǵa sáıkes halyq pen memleket atynan áreket etetin Prezıdent pen Parlament depýtattarynyń tikeleı saılaýymen baılanysty. Eń aldymen, halyq Memleket basshysyn jańarǵan konstıtýsııalyq mártebede jáne jańartylǵan saılaý zańymen saılaýy kerek. Sonyń birden-bir dáleli – 2022 jylǵy maýsymda ótken jalpyhalyqtyq referendýmǵa el azamattarynyń kópshiliginiń qatysýy. Aldaǵy saılaýdy Qazaqstan tarıhyndaǵy jańa sapaly kezeńniń bastaýy retinde qabyldaımyn. Bul – ádiletti qoǵam qurý jolyndaǵy mańyzdy qadam. О́z kezeginde, Qasym-Jomart Toqaev saılaý naýqanynyń qatań zań sheńberinde ótetinine, otandyq jáne halyqaralyq baıqaýshylardyń qatysatynyna kepildik berdi.
Táýelsizdik bárinen de qymbat! Demek búgingi býyn memleketimizde júzege asyp jatqan saıası ózgeristerdiń kýási bola otyra, óz tarapynan sol táýelsizdiktiń nyǵaıýyna, kemeldenýine ózindik úles qosýǵa meılinshe múddeli bolýǵa tıis.
Baǵysh ǴABDÝLLINA,
L.N.Gýmılev atyndaǵy EUÝ saıasattaný kafedrasynyń meńgerýshisi,
professor
