Aýyr salmaqty kólikterdiń júrýine ýaqytsha shekteýler engiziledi

ASTANA. 19 mamyr. 8 tonnadan asatyn júk kóteretin aýyr salmaqty kólikterdiń qozǵalysyna jazǵy kezeńge oraı shekteýler qoıyldy.  Bul týraly  Kólik jáne kommýnıkasııa mınıstrliginiń baspasóz qyzmeti habarlady. Aýyr  salmaqty júk kólikteriniń qozǵalysyna  shekteýler Almaty, Atyraý, Jambyl, Qaraǵandy (Jezqazǵan óńiri), Qyzylorda, Ońtústik Qazaqstan jáne Mańǵystaý oblystary úshin 1 maýsym men 30 tamyz aralyǵynda qoıylady. Al,  Aqmola, Aqtóbe, Shyǵys Qazaqstan, Batys Qazaqstan, Qaraǵandy (Qaraǵandy óńiri), Qostanaı, Pavlodar jáne Soltústik Qazaqstan oblystarynda atalǵan shekteýler 1 maýsymnan 15 tamyzǵa deıin engizilmek. Habarlamada aıtylǵandaı, bul shara jalpy qoldanystaǵy respýblıkalyq mańyzy bar avtomobıl joldarynyń betki jabyndysyn saqtaý maqsatynda qolǵa alynyp otyr.  Kóliktik baqylaý komıteti tóraǵasynyń orynbasary Bolat Smaǵulynyń sózine qaraǵanda, mundaı shekteýler jyl saıyn jazǵy kezeńde joldyń joǵarǵy tósemin saqtaý maqsatynda engiziledi, óıtkeni, temperatýra +25 gradýstan asqanda asfalt qyzyp, aýyr júkke shydas bermeıtin kórinedi. Sonyń saldarynan aýyr salmaqty kólik júrip ótkende jol jamylǵysy buzylady. Bul arada qozǵalys shekteýleri tún mezgilinde qoıylmaıtynyn aıta keteıik. Dáliregi, júk kólikteriniń qozǵalysyna shekteý ońtústikte saǵat 10-00-den 22-00-ge deıin, al soltústik jáne ortalyq oblystarda 11-00-den 21-00 aralyǵynda qoıylady. Joldybaı Bazar. Derekkóz: mtc.kz. Foto: 1zoom.ru.