«Elektrondyq úkimetti» damytý deńgeıi boıynsha 38-oryndamyz

ASTANA. 19 mamyr. BUU reıtıngisi kórsetip bergendeı, 190 eldiń arasynda Qazaqstan «elektrondyq úkimetti» damytý deńgeıi boıynsha 38-orynǵa ıe boldy. ASTEX-2014 aqyldy tehnologııalar kórme-konferensııasynyń ashylýynda  Baılanys jáne aqparat agenttiginiń tóraǵasy Asqar Jumaǵalıev osylaı dedi. Bul týraly primeminister.kz habarlady. Jıynda Asqar Jumaǵalıev: «Elektrondyq úkimetti» damytýda Qazaqstan BUU sholýyna sáıkes 190 eldiń arasynda 38-orynda tur. Al elektrondyq qatysýdy damytý boıynsha bizdiń el 2-oryndy Sıngapýrmen bólisti», – dedi. Agenttik tóraǵasynyń aıtýynsha, telekommýnıkasııalyq ınfraqurylymdy damytý baǵytynda aıtarlyqta tabystarǵa qol jetkizilgen. Osy oraıda ol: «Jaqsy kórsetkishterge qaramastan, áli de tynbaı eńbek etý qajet, ıaǵnı, Memleket basshysy qol qoıǵan úlken baǵdarlama aıasynda aqparattyq-kommýnıkasııalyq tehnologııalar salasynda jańa nátıjelerge jetý kerek», – dep sózin sabaqtady. Agenttik basshysynyń sózine súıene sóılesek, búgingi tańda elimizdegi vırtýaldy kommersııa aınalymy shamamen 600 mln. dollarǵa jetken. Bul árıne, óte jaqsy kórsetkish. Joldybaı Bazar. Derekkóz: primeminister.kz. Foto: primeminister.kz.