Tehnologııa • 28 Qyrkúıek, 2022

Digital Bridge: Túrki elderiniń 6 tehnoparki memorandýmǵa qol qoıdy

Búgin Túrki Memleketter Uıymyna múshe elderdiń tehnoparkteri arasynda Yntymaqtastyq týraly memorandýmǵa qol qoıý saltanaty ótti, dep habarlaıdy Egemen.kz.

Janbolat Kenjeǵul

Sonyń ishinde Sabah Lab (Ázerbaıjan), JTP (Qyrǵyzstan), Bilisim Vadisi (Túrkııa), Bilkent Cyberpark (Túrkııa), О́zbekstan IT parki (О́zbekstan) jáne bizdiń elden Astana Hub IT-startaptar tehnoparki ortaq kelisim jasasty.

Aımaqtaǵy AKT jáne ınnovasııalyq ekojúıeni birlesip damytýǵa baǵyttalǵan bul memorandým Qazaqstan Prezıdenti Qasym-Jomart Toqaevtyń bastamasy aıasynda jasalǵan. Túrkitildes memleketterdiń yntymaqtastyq keńesiniń VIII sammıtinde túrki elderiniń zamanaýı tehnoparkteri ortalyǵyn ashýdy usynǵan bolatyn.

«Biz zamanaýı tehnoparkter assosıasııasyn qurý jáne TMU elderiniń negizgi IT-tehnoparkteriniń platformalaryn ıntegrasııalaý múmkindigin qarastyramyz. Sondaı-aq IT startaptardyń mobıldiligin arttyrý úshin «Digital Nomad» IT-rezıdenttik baǵdarlamasyn júzege asyrý máselesin talqylamaqpyz», dedi Astana habtyń bas dırektory Maǵjan Mádıev.

«Meniń oıymsha, bul forým - Ortalyq Azııa elderiniń basyn qosatyn keremet bastamalardyń biri. Jahandyq turǵyda bizdiń elder tym shaǵyn bolýy múmkin, alaıda túrkitildes elderi biriksek, joǵary deńgeıge shyǵa alamyz. Marketıng jaǵynan alsaq, bul bárimiz úshin tıimdi bolmaq. Biz básekeles emespiz, qaıta bir-birimizdi qoldap, tolyqtyrǵymyz keledi», dedi Chýbak Temirov, Qyrǵyzstan Respýblıkasy Joǵary tehnologııalar parkiniń dırektory.

Forým alańynda ótip jatqan kórmege Túrkııa, Ázerbaıjan, О́zbekstan, Qyrǵyzstan, Túrkimenstan, Tájikstan, Palestına jáne Qazaqstannyń 13 tehnoparki qatysyp jatyr. Sonymen qatar erteń, 29 qyrkúıekte tehnoparkterdiń basshylary paneldik pikirtalastar ótkizip, óz memleketterindegi ınnovasııalyq ekojúıeni damytý baǵytyndaǵy bastamalar men jobalar jaıly aıtady. Jáne TMU-na múshe memleketterdiń kásipkerleri men IT-mamandary úshin qolaıly jaǵdaı jasaý joldaryn talqylaıdy.

Digital Bridge halyqaralyq forýmy Astana qalasynda 2018 jyldan beri ótkizilip keledi. Bıyl forýmnyń baǵdarlamasy aıasynda 45 paneldik sessııa, tehnoparkter kórmesi, IT-startaptar alleıasy, IT-mektepter kórmesi, IT-vakansııalar jármeńkesi, Astana Hub Battle jarysy qarastyrylǵan.

Uıymdastyrýshylar - Sıfrlyq damý, ınnovasııalar jáne aeroǵarysh ónerkásibi mınıstrligi, Astana qalasy ákimdigi men Astana hub IT-startaptar halyqaralyq tehnoparki.