Bıýdjet qarjysyn paıdalanýdaǵy olqylyqtar

Parlament Senatynda Úkimettiń jáne Respýblıkalyq bıýdjettiń atqarylýyn baqylaý jónindegi esep komıtetiniń 2013 jylǵy respýblıkalyq bıýdjettiń atqarylýy týraly esepteriniń tanystyrylymy boldy, dep habarlady Senattyń baspasóz qyzmeti. Depýtattardyń aldynda Premer-Mınıstrdiń orynbasary – Qarjy mınıstri Baqyt Sultanov pen Esep komıtetiniń tóraǵasy Qozy-Kórpesh Jańbyrshın baıandama jasady. B.Sultanov jyl qorytyndysy boıynsha eki naqtylaýdy esepke ala otyryp, respýblıkalyq bıýdjetke túsetin túsimder jospary 100,6 paıyzǵa nemese 5 272,4 mıllıard teńgege atqarylǵanyn aıtty. Úkimettiń esebi boıynsha kirister is júzinde 2012 jylmen sa­lys­tyrǵanda, 7,8 paıyzǵa ósken. Bıýd­jetke kirister 5 179,5 mıllıard teńge somasynda nemese 100,5 paıyz túsken. 2013 jylǵa arnalǵan res­pýb­lıkalyq bıýdjet shyǵystaryna qatysty aıtar bolsaq, olar 5 990,5 mıllıard teńgeni nemese josparǵa 99,3 paıyzdy quraıdy. 2012 jylmen salystyrǵanda, onyń ósimi 194,8 mıllıard teńgeni qurady. Respýblıkalyq bıýdjet shy­ǵys­tarynyń qurylymynda negizgi úlesti áleýmettik sala shyǵystary alyp otyr – 2 336,4 mıllıard teńge nemese 36,0 paıyz, onyń 1 239,9 mıllıard teńgesi zeınetaqylar men járdemaqylardy quraıdy. Qarjynyń 42,9 mıllıard teń­gesi paıdalanylmaı qalǵan. Q.Jańbyrshın 2013 jylǵy res­pýblıkalyq bıýdjettiń atqarylýy týraly negizgi qorytyndyny aıta otyryp, bıýdjet qarjysyn tıimdi paıdalanýdy arttyrý, bıýdjet qarjysynyń maqsatty jáne ataý­ly paıdalanylýyn qamtamasyz etý, sondaı-aq, respýblıkalyq bıýd­jet qarajatynyń atqarylýyn jetildirý jáne memleket aktıvterin paıdalanýdyń tıimdiligin arttyrý týraly usynystar aıtty. Bıýdjettik baǵdarlamalar ákimshileriniń respýblıkalyq bıýdjetti birneshe márte naqtylap, túzetýlerine qaramastan 2013 jylǵy respýblıkalyq bıýdjet qarjysyn paıdalaný barysynda tıimdiliktiń jetispeýshiligi oryn aldy. 2014 jylǵy 1 qańtarda ortalyq memlekettik organdar 43,2 mıllıard teńgeni ıgermedi, jergilikti atqarýshy organdar ıgerilmegen jáne óz maqsatyna paıdalanylmaǵan 26,0 mıllıard teńge maqsatty transfertterdi bıýdjetke qaıtardy. Kvazımemlekettik sektor sý­bektileriniń esepshottaryndaǵy qaldyq qarajat 62,6 mıllıard teńgeni qurady. Esep qujattarynyń tanystyrylymy barysynda senatorlar jergilikti bıýdjetterdiń kiris bazasyn odan ári jetildirý, memleket aktıvterin basqarý tetikteri, at­qarýshylyq tártipterdi buz­ǵany úshin jaýaptylyq, qar­jy monıtorıngi júıesiniń pármen­­diligi, salyq jáne keden ákim­shi­len­dirýleriniń tıimdiligin jetildirý, jumys oryndaryn ulǵaıtý máselelerin kóterdi. Esepterdi talqylaý Parlament Senaty Qarjy jáne bıýdjet komı­tetiniń tóraǵasy Rashıt Ahmetov jetekshilik etetin jumys tobynda jalǵasatyn boldy.