Aldaǵy ister aýqymdy

Prezıdent janyndaǵy Ortalyq kommýnıkasııalar qyzmetinde ótken dástúrli brıfıngke Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev, Aýyl sharýashylyǵy mınıstri Asyljan Mamytbekov, Qarjy vıse-mınıstri Berik Sholpanqulov jáne «Báıterek» ulttyq basqarýshy holdıngi» AQ basqarma tóraǵasy Qýandyq Bıshimbaev qatysyp, Úkimet atqaryp jatqan birqatar máseleler tóńireginde aıtyp berdi. «Úkimet ındýstrııalyq-ınno­va­sııalyq damý memlekettik baǵdar­lamasynyń ekinshi besjyldyǵyn maquldady. Memleket basshysy ony bekitkennen keıin Úkimet sharalardyń tyńǵylyqty josparyn qabyldaıtyn bolady», dedi Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev. Ekinshi besjyldyq tórt baǵyt boıynsha damytylmaq. Bi­rin­shisi, makroekonomıkalyq turaq­tylyqty jáne qarjylyq bazanyń ósýin qamtamasyz etýi tıisti shıkizattyq sektor. Ekinshisi, ósim sapasyn qamtamasyz etetin óńdeý ónerkásibi. Úshinshisi, bolashaqta básekelestikti qamta­masyz etetin ınnovasııalyq sektor bolsa, tórtinshisi adamdardy jumyspen qamtıtyn sektor. Osy besjyldyqta bıznestiń baryn­sha belsendi qatysýy nazar­ǵa alynǵan. Atap aıtqanda, Ult­tyq kásipkerler palatasy baǵdar­lamany ázirleýge de, ony júzege asyrýǵa da atsalyspaq. «Aýyl sharýashylyǵy mı­nıs­trligimen «2015-2019 jyldarǵa arnalǵan QR azyq-túlik óndirisin damytý» baǵdarlamasy ázirlendi. Baǵdarlama aıasynda salada bir­qatar mańyzdy mindetter jú­zege asyrylmaq. Baǵdarlamany júzege asyrý nátıjesinde 2019 jyly azyq-túlik jáne qaıta óńdeý salasynyń negizgi kapıtalǵa ınvestısııa kólemi 97 mıllıard teńgege, azyq-túlik óndirisi kólemi 30 paıyzǵa, ıaǵnı 1271 mıllıard teńgege jáne azyq-túlik óndirisinde 68 myń adamǵa deıin jumysbastylyq deńgeıiniń ulǵaıyp, azyq-túlik óndirisiniń ımport kólemi 3 esege deıin tómendemek», dedi Aýyl sharýashylyǵy mınıstri Asyljan Mamytbekov. Mınıstrliktiń quzyretine kiretin máselelerdi sheshý úshin 2013 jyldyń aqpan aıynda qabyldanǵan «Agrobıznes-2020» baǵdarlamasymen jańa memlekettik quraldar qarastyrylǵan. Jalpy, 2013 jyly azyq-túlik jáne aýyl sharýashylyǵy shıkizatynyń qaıta óńdeý taýarlarynyń ishki saýda-sattyq aınalymy 4 250 mıllıon dollardy quraǵan. Statıstıka agenttiginiń málimetteri boıynsha, ótken jyly aýyl sharýashylyǵy shıkizatyn qaıta óńdeý kásip­oryndary respýblıkalyq óner­kásip óndirisiniń 5 paıyz, al qaıta óńdeý óndirisiniń 16,5 paıyzyn óndirgen. Azyq-túlik ónimderin óndirý qurylymyndaǵy negizgi úlesti astyqty qaıta óńdeý, nan jáne nan-toqash, etti qaıta óńdeý men jemis-kókónis syndy ózge de salalar alady. Sondaı-aq, munymen birge jeke pozısııalar boıynsha ımporttyń qomaqty úlesi saqtalyp keledi. Byltyrǵy jyldyń qo­ry­tyndysyna sáıkes elimizge 3 mıllıard dollar somasynda azyq-túlik ónimderi ımporttalǵan. Ol negizinen kondıterlik, sút ónim­deri, qant, qus eti men jemis-kókónis konservilerinde kórinis tapqan. Ábdirahman QYDYRBEK, «Egemen Qazaqstan».