«TikTok kompanııasynyń vıse-prezıdenti Teo Bertrammen kezdestim. Bertram myrza Google kompanııasynda jaýapty qyzmet atqarǵan, Ulybrıtanııanyń eki birdeı premer-mınıstrine keńesshi bolǵan tájirıbeli adam.
TikTok Qazaqstanda týrızm boıynsha birikken jobalardy bastaǵan eken. Endi baspasóz hatshylaryn oqytý, sıfrlyq saýattylyqty arttyrý, áleýmettik jelini tıimdi qoldaný jaǵynan ortaq trenıngter uıymdastyrý týraly aıttym», dep jazdy mınıstr.
Onyń aıtýynsha, kompanııa ókili muny quptaǵan. Sonymen qatar keleshekte TikTok ınterfeısi qazaqshalanady.
«Kezdesýde TikTok ınterfeısine qazaq tilin engizý jáne qazaqsha kontentti birlese damytýdy usyndym. Kompanııa ókili jelige qazaq tilin ornatý jaıy qarastyrylyp jatqanyn jetkizdi.
Mınıstrlik aqparat, jastar, otbasy jáne azamattyq qoǵamdy damytý boıynsha ýákiletti organ bolǵandyqtan, kompanııamen kreatıvti kontentter jáne zamanaýı sapaly materıaldar jasaýǵa múddeli. Máselen, jelide Bala house, «El birligi» jobalary jaqsy kórilip jatyr. Bul baǵyttaǵy jobalardy birge jalǵastyryp, TikTok haýstardy uıymdastyramyz. Sebebi kompanııa jelide bilim berýge qatysty, ımıdjdik kontentterdi kóbeıtýdi de josparlap otyr eken», delingen mátinde.
Sondaı-aq mınıstr Teo Bertramdy jýyrda ótetin Astana Media Week aptalyǵyna shaqyrǵan. Al mártebeli meıman aýqymdy is-sharaǵa qatysýǵa yntaly ekenin bildirgen.
«Taǵy bir jańalyq, jýyrda Qazaqstanda TikTok-tyń ofısi ashylady. Bul Qazaqstannyń belgili kompanııamen tyǵyz baılanys ornatyp, elge qajetti dúnıelerdi aqyldasa otyryp jasaýǵa taptyrmas múmkindik dep oılaımyn.
Astanada ótken Digital Bridge forýmynda Memleket basshysy Qazaqstannyń aldynda sıfrlyq transformasııanyń basymdyqtaryn jarııalaǵany belgili. Atalǵan kezdesýler Prezıdent qoıǵan mindetterdi sapaly oryndaýǵa múmkindik beredi dep senemin», dep jazdy avtor sóz sońynda.
