Saıasat • 07 Qazan, 2022

Judyryqtaı jumylý eldi jigerlendiredi

51 ret kórsetildi

«Amanat» partııasynyń tarıhı sezinde elimizdiń túkpir-túkpirinen 1 200 delegat bas qosyp, aldaǵy prezıdent saılaýyna óz úmitkerimiz – Qasym-Jomart Kemeluly Toqaevty usyndyq. Amanattyqtar bul bastamany biraýyzdan qoldady.

Sonymen qatar sezde partııamyzdyń jańa saıası tuǵyrnamasyn qabyldadyq. Tuǵyrnama – uzaqmerzimdi ári strategııalyq qujat. Partııa aldaǵy qyzmetinde osy ustanymdardy basshylyqqa alady. Basty qaǵıdasy – Adam, Qoǵam jáne Memleket. Tuǵyrnamada qazaqstandyqtardyń muń-muqtajy kórinis tapqan. Ult múddesi basty nazarda tur. Biz naqty isterge, naqty jobalarǵa basymdyq beremiz.

Barshańyzǵa málim, bizdiń partııadan basqa da birqatar saıası uıymdar men birlestikter prezıdenttikke Memleket basshysy Qasym-Jomart Toqaevtyń kandıdatýrasyn usynyp otyr. Osy oraıda biz sol saıası uıymdarmen birlesip, Qasym-Jomart Toqaevty qoldaý jónindegi halyqtyq koalısııa qurý týraly kelistik. Koalısııa músheleri Memleket basshysynyń qatysýymen ótken forýmda bas qostyq.

Biz Prezıdenttiń strategııalyq baǵdaryn qoldaımyz jáne onyń reformalaryn ári qaraı ilgeriletýge kúsh salamyz. Halyqtyq koalısııa 20-dan astam respýblıkalyq qoǵamdyq birlestik pen saıası uıymnyń, myńnan astam qaıratker tulǵa men belsendi azamattyń basyn biriktirip otyr.

Bul tańdaý – elimizdiń shynaıy patrıottarynyń, Qazaqstannyń bolashaǵyna beıjaı qaramaıtyn mıllıondaǵan azamattardyń tańdaýy. Eń bastysy, saılaý qarsańynda jetekshi saıası kúshterdiń ortaq maqsat jolynda judyryqtaı jumylýy eldi jigerlendiredi. Halqymyzdyń yntymaǵyn eselep arttyra túsedi.

Biz osy qadam arqyly dala demokratııasynyń dástúrine beriktigimizdi kórsetip, ótken ǵasyrlarda ordaly Ordabasyda, qasıetti Qaraqumda, ult besigi – Ulytaýda shaqyrylǵan tarıhı quryltaılardyń tabıǵı sabaqtastyǵyn jalǵap otyrmyz.

Qazaqta «Týyń jyǵylmasyn!» degen ataly sóz bar. Kók Týymyz – eldiktiń, memlekettiliktiń basty nyshany. Memleket basshysy qandaı qıyn-qystaý kezeńde de eldiń baıraǵyn, memlekettiń týyn jyqqyzbaı óz tuǵyrynda jelbiretip keledi.

Barshamyz sol Týdyń astyna jınalaıyq!

 

Erlan QOShANOV,

«Amanat» partııasynyń Tóraǵasy

Sońǵy jańalyqtar

Reseıde zaýyt órtendi

Oqıǵa • Keshe

Uqsas jańalyqtar