Parlament • 07 Qazan, 2022

Máýlen Áshimbaev: Halyqtyq koalısııanyń usynysy – elimizdiń erteńi úshin eń utymdy sheshim

90 ret kórsetildi

Bul týraly Parlament Senatynyń Tóraǵasy Máýlen Áshimbaev Facebook-tegi paraqshasynda jazdy, dep habarlaıdy Egemen.kz.

«Kesheli beri elimizdegi iri saıası kúshter, respýblıkalyq qoǵamdyq birlestikter, ardagerler men jastar uıymdary jáne basqa da ujymdar aldaǵy prezıdent saılaýyna Qasym-Jomart Kemeluly Toqaevtyń kandıdatýrasyn usynyp jatyr. AMANAT partııasynyń kezekten tys XXIV sezinde de Memleket basshysyn Qazaqstan prezıdenttigine úmitker retinde usyný týraly sheshim qabyldanǵany belgili.

Osyǵan oraı halyqtyq koalısııa qurylyp, onyń quramyna engen barlyq saıası partııalar men qoǵamdyq uıymdar biraýyzdan Qasym-Jomart Toqaevtyń kandıdatýrasyna qoldaý bildirdi. Bul – memlekettiligimiz ben táýelsizdigimizdi nyǵaıtý jolynda jasalǵan mańyzdy qadam. О́ıtkeni qazirgideı kúrdeli kezeńde bizge osyndaı ortaq paıym men bekem birlik aýadaı qajet», dep jazdy M.Áshimbaev.

Sondaı-aq ol eldiń yntymaǵyn arttyrýǵa arnalǵan jeti qaǵıdaǵa toqtalyp ótti.

«Qoldaýshylar forýmynda Prezıdentimiz eldiń yntymaǵyna basa mán berip, ultty uıystyratyn jeti qaǵıdaǵa nazar aýdardy. Bul oraıda Memleket basshysy Táýelsizdik, jerimizdiń tutastyǵy, memlekettik múdde, rýhanı úndestik, zańdylyq pen tártip, jasampazdyq jáne dostyq peıil men meıirimdilik bizdiń eldik jolyndaǵy eń basty qundylyqtarymyz ekenin aıryqsha atap ótti», dedi Senat Tóraǵasy.

M.Áshimbaevtiń aıtýynsha, sońǵy jyldarda Prezıdentimizdiń bastamasymen elimizde aýqymdy saıası, ekonomıkalyq jáne áleýmettik reformalar tabysty iske asyrylyp keledi. Sonyń nátıjesinde saıası júıemiz aıtarlyqtaı jańǵyrtylyp, demokratııa, ádilettilik, zań ústemdigi, barlyq azamatqa teń múmkindik sııaqty qaǵıdalarǵa basymdyq berilýde. Halyqtyń ál-aýqatyn jaqsartýǵa aıryqsha kóńili bólinip, osy baǵytta naqty jobalar qolǵa alyndy. Aldaǵy ýaqytta da osyndaı ıgi bastamalardy tabandy jáne júıeli túrde jalǵastyrý asa mańyzdy.

«Sondaı-aq qazirgi tańda búkil álemmen birge Qazaqstan da túrli jahandyq syn-qaterlermen betpe-bet kelip otyr. Osyndaı almaǵaıyp shaqta bizge eldi barlyq synaqtan súrindirmeı alyp shyǵatyn naǵyz kóshbasshy qajet. Osy turǵydan kelgende, kópshiliktiń Qasym-Jomart Toqaevtyń kandıdatýrasyn qoldaýy halyqtyń Memleket basshysyna degen senimi ekeni sózsiz. Sondyqtan halyqtyq koalısııanyń usynysy – elimizdiń erteńi úshin eń utymdy sheshim», dep jazbasyn qorytyndylady M.Áshimbaev.

Sońǵy jańalyqtar

Reseıde zaýyt órtendi

Oqıǵa • Keshe

Uqsas jańalyqtar