Jaılylyq – jylýdan

Qyrkúıektiń 24-inen bastap Soltústik Qazaqstan oblysynda 2022-2023 jyldardaǵy jy­lytý maýsymy bastaldy. Qyr­kúıektiń sońǵy kúnderi men qa­zannyń basynda qylyshyn súı­ret­ken qystyń alǵashqy yzǵary tústi. Alaıda qazannyń osy kúnderi qaıta jaılanyp, qazir aýanyń temperatýrasy kúndiz 7-8 gradýstyq jylylyq kórsetip tur. Mızamshýaq ta áli alda sııaq­ty. Biraq túnniń yzǵary bar. Qazan aıyn teriskeı óńir sýyq­tan kúshene beretindikten «kú­shen­shek» aıy dep te ataıdy. Sol «kúshen­shektiń» túngi yzǵary adam­­dy búristirip jiberedi.

Petropavl qalasynyń ákimi Rýslan Ańbaevtyń aıtýyna qara­ǵanda, oblys ortalyǵynda áleý­met­tik salanyń barlyq 177 nysanyna jylý berildi. Ortalyq jylý júıesine qosylatyn 1 115 kópqabatty úıdiń 1 109-yna jylý berildi, tek da­ıyn­­dyq pas­portyn almaǵan 6 úıge ǵana jylý berilgen joq. Jaǵany jaı­laýǵa salǵan úıler­diń tur­ǵyn­­­dary erteń sýyq qysa bas­ta­ǵan­­da shýlaıtyny belgili. О́zin ózi basqarýǵa úırene almaı kele jat­qan osy ispetti úıler áli de barshylyq.

Petropavl qalasynda 4 myńǵa jýyq jekemenshik turǵyn úı sektory bar. Onyń birazy ortalyq jylý júıesine qosylǵan. Biraq basym bóligi ot jaǵady. Jylý maýsymynda 70 myń tonnadaı kómir tutynady. 4 qazandaǵy málimetke qaraǵanda, qalanyń temir jol tuıyqtarynda 35,1 myń tonna kómir qory bar. «Qalǵany maýsym boıyna jetkizilip tura­dy», dedi R.Ańbaev. Qoldaǵy qor­da jınalǵan kómirdiń 910 tonnasy – «Shubarkól», 811 tonnasy – «Maıkóbe», 300 tonnasy – «Ekibastuz» kenderinen. Al qala turǵyndary joǵary baǵalaıtyn, qyzýy jaqsy «Qarajyra» kómiri áli jetkizilmegen.

Oblystyq turǵyn úı-kom­mý­naldyq sharýashylyǵy basshy­sy­nyń mindetin atqarý­shy P.Shılov óńirdegi 285 shaqy­rym­­dyq jylý júıesi túgel da­ıyn­­dyq sapynda turǵanyn aıtty. Sonyń 6,3 shaqyrymyna bıyl kúrdeli jón­deý jumystary júr­gizilgen. 602 shaqyrymnan turatyn sý jet­ki­zý júıeleri de tolyǵymen da­ıyn. Oblystaǵy 324 avtonomdy qazandyq ta iske qosylýǵa ázir. Bilim salasynyń – 604, den­saý­lyq saqtaý salasynyń – 369 jáne mádenıet salasynyń 167 nysany jylýǵa qosylǵan.

Oblystaǵy bý qazandyq­ta­ry­men jylytylatyn barlyq bıýd­jet­tik mekemelerge qajetti 141 myń tonna kómir jetkizilgen. Alaı­da turǵyndarǵa qajetti 419 myń tonna kómirdiń ázirge 249 myń tonnasy ǵana jetkizilipti. Aqqaıyń, Mamlıýt aýdandary qa­jetti mólsherdiń jartysyn ǵana qamtamasyz etken. Sonymen birge barlyq eldi mekende jylý júıesine qosylmaǵan 12 kóp­qa­bat­ty úı bar. Onyń jartysy – Petropavl qalasynda, qalǵan altaýy – Aıyrtaý aýdanynyń ortalyǵy Saýmalkól aýylynda. «Saýmalkóldegi úılerdiń jy­lý­ǵa qosylmaýy jańa ortalyq qazandyqtyń iske qosylmaýyna baılanysty bolyp otyr. Bul qazandyq alǵash ret synaldy, eger aqaý bolmasa turaqty túrde qosylady», dedi Pavel Shılov.

Naýryz aıynda Petropavl qala­synyń JEO-2-de bolǵan apat­tan halyq qulaǵdar. Ákimdik otyrysynda osy kásiporynǵa qaraıtyn «Sevkazenergo» AQ bas dırektory Oleg Perfılov jóndeý jumystarynyń barysy týraly baıandady. Onyń aıtýyna qaraǵanda, qazir JEO-2-niń 12 bý qazandyǵynyń beseýi jumys is­teıdi, bireýi rezervte, taǵy be­seýine jóndeý jumystary júr­­gizilip jatyr. Taǵy bireýin­degi jóndeý jumystary toqta­tyl­ǵan. O.Perfılov jóndeý jumys­tarynyń kestege sáıkes júrgizilip jatqanyn aıtty. Al ortan belinen omyrylǵan murja­nyń tolyǵymen buzylǵanyn aıtty. Bul nómiri birinshi murja bolatyn. Ekinshi murjanyń jóndeý jumystary 18 qazanda aıaq­ta­la­tyn kórinedi. Úshinshi murja jóndeýden ótken, qazir qalypty jumys isteýde. Bul kásiporyn Eki­bastuz kómirin jaǵady. Bú­gin­de qordaǵy kómiriniń kólemi – 124 855 tonna. Bul 21 táýlikke jetedi.

Soltústik Qazaqstan oblysy