Onyń ishinde oblystaǵy irgeli aımaqtyń biri Qarqaraly aýdanyna qatysty serpindi jobaǵa jekeleı toqtalyp, Qarqaraly-Qaraǵandy tas jolyn jóndeý boıynsha naqty tapsyrma berdi. El Prezıdentiniń bul tapsyrmasy ózekti jobaǵa tyń serpin qosatyny anyq.
Qarqaraly-Qaraǵandy tas joly – respýblıkalyq mańyzdaǵy Qaraǵandy-Aıagóz-Buǵaz baǵytyndaǵy joldyń eleýli bóligi. Bul jol sońǵy jyldary ábden tozyp, óńirdiń damý qarqynyn tejep otyrǵan edi. Bıyl osy jolǵa ortasha jóndeýge respýblıkalyq bıýdjetten 600 mıllıon teńge kóleminde qarajat bólinip, joldyń 197-207 shaqyrym bóliginiń 10 shaqyrymyna jóndeý júrgizildi. Bul jumystar sapaly ári ýaqytynda aıaqtalyp, Qarqaralyǵa kelýshi qonaqtar da, jergilikti turǵyndar da ıgiligin kórýde. Endi Prezıdent tapsyrmasyna sáıkes osy bastalǵan jumysty keler jyly jalǵastyryp, sapaly ári ýaqytyly aıaqtaý mindeti tur. Prezıdent «Qarqaralynyń týrıstik áleýetin arttyrý maqsatynda bul jumysty aldaǵy eki jyldyń ishinde aıaqtaý qajet» dep atap aıtty. Iаǵnı aldymyzda aıqyn mindet, naqty meje tur, sony laıyqty deńgeıde oryndaýǵa kúsh salamyz.
Aýdandaǵy 23 aýyldyq okrýg, 62 eldi mekende turatyn 34 myń turǵynnyń laıyqty ómir súrýine qarymdy qadamdar jasalýda. Bul aýdannyń áleýmettik-ekonomıkalyq damýyna úlken serpin beretini sózsiz. Qoıylǵan mindettiń mańyzdylyǵy orasan. Kúre jol aýdanymyzdy oblys ortalyǵymen qosa, jańadan ashylǵan Abaı oblysymen, Semeı óńirimen jalǵaıdy. Eki oblystyń ara qatynasyn nyǵaıtý maqsatynda bul joldy qalypqa keltirýdi jalǵastyrýdyń mańyzy zor.
Qarqaralynyń qara ormanyn tamashalap, ásem tabıǵat aıasyna kelip demalýshy týrısterdiń sany jyl sanap ósýde. Týrısterge óńirde ornalasqan 36 nysan qyzmet kórsetedi. Jyl saıyn jańa nysandar ashylýda. Týrısterdi negizinen aýdan aýmaǵyndaǵy Qarqaraly memlekettik tabıǵı parki qyzyqtyrady. Park aýmaǵynda aldaǵy ýaqytta qosymsha 65 ýchaske týrıstik maqsatta paıdalaný úshin jalǵa berilmek. Byltyrǵy alty aıda aýdanymyzǵa 7 534 adam kelse, osy jyldyń alty aıynda 8 842 týrıst demalýǵa kelgen. Árıne, bul tek resmı derekter. Anyǵynda, bul sandar birneshe ese artyq. Sondyqtan Qaraǵandy men Qarqaraly aralyǵyndaǵy tas joldyń jóndelýi óńirimizge demalýǵa keletin týrıster sanyn arttyratyny anyq. Demek osy baǵyttaǵy jumystardy shıratýymyz kerek.
Prezıdent «Ádiletti memleket. Birtutas ult. Berekeli qoǵam» atty Joldaýynda 2025 jylǵa deıin jergilikti joldardyń 95 paıyz jóndeýden ótetinin aıtty. Memleket basshysynyń tapsyrmasy Joldaýdaǵy osy mańyzdy mindettermen úndesip, elimizdiń damý baǵdarlamasynyń ajyramas bóligine aınalary anyq. Aýdanymyzda osy baǵytta qolǵa alynyp jatqan jumystar bar. О́ńirdegi respýblıkalyq, oblystyq, aýdandyq mańyzy bar joldardy qalypqa keltirý, jóndeý jumystary bastaldy. Buǵan deıin múlde asfalt tóselmegen, jóndeý jumystary júrgizilmegen shalǵaıdaǵy eldi mekenderdiń tozyǵy jetken joldary qalypqa keltirilip jatyr. Aqtasty-Aıryq, Balqantaý, Qoıandy-Mamyraev aýyldarynyń avtojoldaryna ortasha jóndeý jumystary júrgizilýde. Osyndaı jumystar keler jylǵa da josparlanǵan.
Jylma-jyl osy jumystardy atqara alsaq, aýdan joldarynyń jaǵdaıy edáýir jaqsaratyny sózsiz. Iаǵnı Prezıdent atap ótkendeı, óńirimizdiń týrıstik áleýetin arttyryp, alǵa bastyrý, aýdannyń áleýmettik-ekonomıkalyq damýyn tyń serpin berý kózdelýde.
Sonymen qatar aýdanda aýyz sý máselesin sheshýdiń keshendi jobalary, halyqtyń densaýlyǵyn nyǵaıtý boıynsha irgeli bastamalar qolǵa alyndy. Máselen, keler jyly Jarly-Qarqaraly toptyq sý júıesi iske qosylsa, aýdan boıynsha eldi mekenderde 20 medısınalyq nysan salynady. «Aýyl – el besigi» jobasy keńeıtilip, aýyldardy jobaǵa qosý boıynsha jumystar júrgizilip jatyr. Búginde joba aıasynda tórt aýyldyq okrýgte aýqymdy jumys atqarylyp keledi. Qaraǵaıly kentinde aýyz sý jáne káriz júıeleri jóndelýde. Egindibulaq aýylynda zamanaýı deneshynyqtyrý-saýyqtyrý kesheniniń qurylysy qarasha aıynda aıaqtalyp, paıdalanýǵa berilmek. Joba aıasynda Búrkitti, Kóktas aýyldarynda tıisti jumys jasalyp jatyr.
Prezıdent oblys jurtshylyǵymen kezdesýi barysynda óńirdiń óndiristik áleýetimen qosa, tarıhı, rýhanı qundylyqtaryna da erekshe toqtaldy. Shertpe kúıdiń sheberi Táttimbet, kúresker aqyn Mádı, daýylpaz Qasym – bári de Qarqaralynyń kıeli topyraǵynan jaralǵan aıtýly tulǵalar. Qarqaraly – kezinde Alash arystarynyń azat ıdeıalarynyń pisip-jetilgen, qanattanǵan jeri. Sondyqtan tarıhy taǵlymǵa toly shejireli ólkeniń órisin keńeıtip, keshendi túrde damytý jumysyn jalǵastyra beremiz.
Erlan QUSAIYN,
Qarqaraly aýdanynyń ákimi
