Jarystyń ashylý saltanatynda Astana qalasynyń Dene shynyqtyrý jáne sport basqarmasynyń basshysy Samat Jylqybaev Sábıtuly, Astana qalasynyń semserlesý Federasııasynyń basshysy Núsipbekov Erjan Esteýuly sóz sóılep, jarys qatysýshylaryna sáttilik tiledi.
«Búginde dástúrge aınalǵan respýblıkalyq týrnır bıyl on birinshi ret ótkizilip jatyr. Týrnırge qatysatyn jastardyń sany jyl saıyn artyp kele jatqany qýantady. Memleket basshysynyń tapsyrmasy boıynsha buqaralyq sportqa erekshe kóńil bólýdemiz. Búgingi jarys aldymyzdaǵy ulttyq mereke Respýblıka kúnine oraılastyryp uıymdastyrylyp otyr. Osy oraıda, búgingi jarysty uıymdastyrǵan barsha azamattarǵa elimizdiń sport salasyn damytýǵa qosqan úlesteri úshin zor alǵysymdy bildiremin. Sportshylarǵa jeńis tileımin. Eń myqtylary top jarsyn. Semserlesýden «Astana qylyshy» respýblıkalyq týrnırin ashyq dep jarııalaýǵa ruqsat etińizder», dedi Astana qalasynyń dene shynyqtyrý jáne sport basqarmasynyń basshysy Samat Jylqybaev.
Týrnırde jeke jáne komandalyq esepte júzge jýyq qatysýshy kúsh synasady. Jarys qarýdyń qylysh, qanjar jáne naıza sekildi úsh túri boıynsha ótedi.
«Astana qylyshy» týrnıri elimizde semserlesýdi keńinen nasıhattaý jáne qazaqstandyqtardyń óskeleń urpaǵyn zııatkerlik kúrestiń osy túrine tartý, sondaı-aq týrnırge qatysatyn elimizdiń jas sportshylarynyń sporttyq sheberlik deńgeıin arttyrý jáne de Qazaqstan Respýblıkasynyń sporttyq qatynastaryn nyǵaıtý jáne jastar arasynda salaýatty ómir saltyn nasıhattaý maqsatynda ótkizilip otyr. Sondaı-aq «Astana Qylyshy» týrnıri - 2022 jyldyń qarasha aıynyń basynda Shymkentte ótetin kadetter men jasóspirimder arasyndaǵy Qazaqstan chempıonaty aldyndaǵy daıyndyq jarysy bolyp sanalady», deıdi uıymdastyrýshylar.
Týrnır jeńimpazdary men júldegerleri medaldarmen, tıisti dárejedegi dıplomdarmen, kýboktarmen jáne baǵaly syılyqtarmen marapattalady.
Respýblıka kúnine oraı uıymdastyrylǵan týrnır 16 qazanǵa deıin jalǵasatynyn atap ótý kerek.
