Bıyl besinshi ret uıymdastyrylǵan Azııa birinshiligine Qazaqstannyń eki ujymy – «Alataý Arýlary» jáne «Dostyq», О́zbekstannyń «Ýzbechka», Irannyń «Fýlad Mobarake», Úndistannyń «T.Sports», Kýveıttiń «Ál-Kýraın» jáne Koreıanyń «Shýgar Glıders» komandalary qatysty. Áý basta bul dodada Iraqtyń «Zanko» jáne elordanyń «Nur-Sultan» klýbtary da óner kórsetýi tıis edi. Alaıda eki ujym da túrli sebeppen Azııa chempıonatyna qatysýdan bas tartty.
Sóıtip, jeti komanda bir topta baq synap, bir-birimen aınalmaly júıe boıynsha bas júldeni sarapqa saldy. Jarys qorytyndysy boıynsha alty matchtyń barlyǵynda qarsylastarynan basym túsken Koreıanyń «Shýgar Glıders» klýby 12 upaımen Azııa chempıony atandy. Ekinshi oryndy jarys barysynda tek koreıalyq klýbqa ǵana ese jibergen Almatynyń «Dostyǵy» (10 upaı) ıelense, úshinshi orynǵa taǵy bir Qazaqstannyń komandasy – «Alataý Arýlary» (8) taban tiredi. Olar – «Dostyq» pen «Shýgar Glıdersten» jeńilip qaldy. Keıingi oryndarǵa «Ýzbechka», «Fýlad Mobarake», «Ál-Kýraın» jáne «T.Sports» klýbtary jaıǵasty.
Gandboldan áıelder arasyndaǵy komandalyq Azııa chempıonaty osymen tórtinshi márte Qazaqstanda ótkizildi. О́z jerimizde uıymdastyrylǵan úsh birinshiliktiń ekeýinde «Qaısar» komandasy jeńiske jetken bolsa, keıingi jyly «Almaty» klýby bas báıgege ıe bolǵan edi. Al 2017 jyly О́zbekstanda ótken Sary qurlyq básekesinde jergilikti AGMK komandasynyń mereıi ústem boldy. Jyl saıyn jarysty qabyldaýshy eldiń komandalary top jaratyn Azııa chempıonatynda bıyl ıgi «dástúr» buzylyp, tuńǵysh ret shetten kelgen eldiń klýby oza shapty.
Ár eki jyl saıyn ótkizilip kelgen Azııa chempıonaty jospar boıynsha 2020 jyly uıymdastyrylýy tıis edi. Alaıda jarys pandemııaǵa baılanysty bir jylǵa keıin shegerilip, 2021 jyly da jaǵdaı onsha turaqtalmaǵan soń taǵy da bir jylǵa qaldyrylǵan bolatyn. Sóıtip bıyl araǵa úsh jyl salyp chempıonat qaıta jalǵasyn tapty.
