Dıirmen kesheni unnyń alǵashqy legin jergilikti naýbaıhanalar men dúkenderge jetkizip berdi. Ázirge kásiporyn tolyq qýatyna kóshken joq. Táýligine 15 tonna un shyǵarýda. Az ýaqyttan soń qarqyn almaq. Un sapasy jaqsy. Oǵan sebep, qajetti jabdyqtardyń búgingi talapqa tolyq jaýap beretininde. Reseıden ákelingen jabdyqtar mamandardyń baǵalaýyna qaraǵanda uzaq ýaqyt qyzmet etýge jaraıdy. Jartylaı avtomattandyrylǵan dıirmende tórt jańa jumys orny ashyldy.
– Biz tikeleı uzaqtaý ádisin qoldanyp, joǵary jáne birinshi surypty un shyǵaramyz. Shıkizattan týyndaıtyn másele joq. Bıyl óńirde astyq jaqsy shyqty, – deıdi kásiporyn dırektorynyń orynbasary Igor Hýnzarııa.
О́ńirdegi aýyl sharýashylyǵy ónimderin óndirýmen birge óńdeýge de meılinshe nazar aýdarylyp otyrǵanyn aıta ketelik. Aqmola oblysynda un tartýmen 37 kásiporyn aınalysady. Barlyǵy jylyna 800 myń tonnaǵa jýyq un daıyndaıdy. Bıyl suranysqa oraı óndiris kólemi bir jarym esege artty.
– Qazir birinshi kezekte Ortalyq Azııa elderi men elimizdiń ońtústik óńirin unmen qamtamasyz etip otyrmyz desek te bolady. О́zbekstan, Tájikstan, Aýǵanstan tarapynan bizdiń óńirde daıyndalatyn sapaly unǵa suranys mol, – deıdi oblystyq aýyl sharýashylyǵy jáne jer qatynastary basqarmasy basshysynyń orynbasary Qasym Itqusov, – azyq-túlik beldeýinde bolǵandyqtan Astana qalasyna ónim jetkizý tıimdi.
Astyqty óńirde jergilikti ónimdi óńdep, uqsatyp paıdalanýǵa basymdyq berilip otyr. As atasyn molaıtsaq, eldiń dastarqany da júdemeıdi.
Aqmola oblysy,
Jaqsy aýdany
