Osydan tórt jyl buryn Japonııada ótkizilgen álemdik dodada úzdik shyqqan Balqan túbeginiń ókilderi bıylǵy chempıonatta da altynnan alqa taqty. 2018 jylǵy birinshiliktiń fınalynda Italııany (3:2) súrindirgen Serbııa quramasynyń qyzdary bıylǵy fınalda Olımpııa oıyndarynyń eki dúrkin jeńimpazy (2008, 2012) Brazılııadan aılasyn asyrdy. Úsh sette – 26:24, 25:22, 25:17 esebimen jeńiske jetken serbııalyqtar osylaısha qatarynan ekinshi ret álem chempıony atandy.
Al úshinshi oryn úshin ótken básekede tórt jyl burynǵy fınalıst Italııa Tokıo Olımpıadasynyń chempıony AQSh-tan 3:0 esebimen basym túsip (25:20, 25:15, 27:25), álem chempıonatynyń qola júldesine ıe boldy. Toptyq kezeńde óner kórsetken Qazaqstan quramasy 24 eldiń ishinde 23-orynǵa turaqtady.
