Qalalyq chempıonatty №3 órt sóndirý bóliminde Soltústik Qazaqstan oblysy tótenshe jaǵdaılar departamentiniń órt sóndirý jáne apatty qutqarý qyzmetiniń bastyǵy, azamattyq qorǵaý polkovnıgi Nurlan Núkishev ashyp, qatysýshylarǵa sáttilik tiledi.
«О́rt sóndirý isi úlken sheberlikti, eptilikti, tapqyrlyqty, jyldamdyqty talap etetin kásip. Sizder sol ádisterdi úırenýge talaptanyp jatqan órensizder. Sondyqtan talaptaryńyzǵa nur jaýsyn! Bolashaqta órt apattaryna qarsy kúreste birge bolaıyq!» dedi ol.
«Bolashaq» qoǵamdyq qorynyń prezıdenti Alma Mustafına da oqýshylardyń arasyndaǵy birinshilik azamattyq qorǵanysqa tárbıeleıtinin jetkizdi.
Qyzyljarda osy kúnderi mızamshýaq shalqyp, kún nury quıylyp tur. Bul jarysqa qatysýshy komandalardyń da kóńil kúıin kóterip, arqa-jarqa kóńildi sát ornady. On komandanyń quramynda 60 qatysýshy boldy, al olardyń jankúıerleri qalyń top bolyp minberden oryn aldy.
Eń alǵashqy tapsyrma – órt sóndirý satysymen ekinshi qabatqa órleý. Jyldamdyq pen eptilikti qajet etetin bul tapsyrma ońaı emes. Ýaqytty únemdep, qolyndaǵy shlangany súıretip ekinshi qabatqa kóterilýdiń ózi kúsh-jigerdi talap etedi. Bul jarysta №6 qazaq orta mektebiniń oqýshysy Danııar Áýbákirov birinshi oryn aldy. Atalǵan mekteptiń oqýshysy Imaq Maqsat ekinshi jáne №31 mekteptiń oqýshysy Kırıll Zaısev úshinshi orynǵa ıe boldy.
Ekinshi tapsyrma ústine órt sóndirýshiniń qalyń kıimin kıip, 100 metrlik kedergili qashyqtyqty jyldam júgirip ótýge arnaldy. Bul jarysta da atalǵan mektepterdiń oqýshylary alda boldy. Al órt sóndirý shlangasyn jyldam iske qosyp, sýdy órtke baǵyttaýda Ál-Farabı atyndaǵy mekteptiń komandasyna teń keler eshkim bolmady. Ekinshi oryndy №6 qazaq orta mektebiniń komandasy ıelendi.
Jarys qorytyndysy boıynsha komandalyq birinshi oryndy – №6, ekinshi oryndy – №32, úshinshi oryndy №31 mektepterdiń komandalary ıelendi.
PETROPAVL
