Bul eńbekti atalǵan ınstıtýttaǵy Derektaný, tarıhnama jáne otan tarıhy bóliminiń jetekshi ǵylymı qyzmetkeri, ǵalym Seıitqalı Dúısen men ınstıtýt dırektorynyń orynbasary, pedagogıka ǵylymdarynyń kandıdaty Jabaı Qalıev birlesip jazǵan. Onda belgili memleket jáne qoǵam qaıratkeriniń ómiri men qyzmeti naqty derektermen órilip, tanymal tulǵanyń týǵan jeri, ósken ortasy jáne eńbegi men ómirdegi qarapaıym beınesi jan-jaqty qamtylǵan. Kitapqa jazǵan alǵysózinde tarıh ǵylymdarynyń doktory, professor Ǵanı Qarasaev jınaq avtorlarynyń izdenisin aıryqsha atap, tarıhı tanymdyq baǵytta jazylǵan bul eńbekti tulǵatanýǵa qosylǵan bir úles dep baǵalaǵan.
Sabyr Nııazbekov – qazirgi Aqmola oblysy Astrahan aýdanynyń О́rnek aýylynda ómirge kelip, alǵashqy eńbek jolyn 16 jasynda aýyldyq keńestiń hatshylyǵynan bastap, Aqmola, Qaraǵandy, Qostanaı, Ońtústik Qazaqstan, Soltústik Qazaqstan, Batys Qazaqstan, Jambyl jáne Almaty oblystarynda jaýapty qyzmet atqaryp, sol óńirlerdiń áleýmettik-ekonomıkalyq damýyna zor úlesin qosty. Sondaı-aq 1965-1978 jyldary Qazaq KSR Joǵarǵy Keńesi Tóralqasynyń tóraǵasy jáne KSRO Joǵarǵy Keńesi Tóralqasy tóraǵasynyń orynbasary boldy.
Mazmundy is-shara aıasynda Memleket tarıhy ınstıtýtynyń dırektory, tarıh ǵylymdarynyń doktory, professor Erkin Ábil sóz alyp, jańa kitap týraly taǵylymdy oı qozǵasa, Sabyr Bilálulynyń týǵan aǵasy Rahmettiń qyzy – Nazym apamyz jınaq avtorlaryna alǵysyn aıtyp, jyly lebizin bildirdi. Sonymen birge otyrysta L.N.Gýmılev atyndaǵy Eýrazııa ulttyq ýnıversıteti tarıh fakýltetiniń dekany, tarıh ǵylymdarynyń doktory, professor Tilegen Sadyqov, Memleket tarıhy ınstıtýty dırektorynyń orynbasary, tarıhshy ǵalym Búrkit Aıaǵan, ardager ustaz Ospan Súleımenuly jáne taǵy basqa zııaly azamattar sóz alyp, kitapqa keıipker bolǵan tulǵanyń qaıratkerligi men jınaqtyń jańalyǵy jaıyndaǵy oı-pikirlerin ortaǵa saldy.
