Qazir Elektrondy eńbek bırjasynyń bazasynda mynadaı resýrstar bar. Enbek.kz biryńǵaı sıfrlyq platformasynda jumysqa ornalastyrý boıynsha 5 onlaın alań, jumyspen qamtýmen aınalysatyn 44 jeke agenttik jáne jumyspen qamtıtyn 205 ortalyq bar.
Skills Enbek onlaın oqytý platformasy – halyqtyń daǵdylaryn jetildirýge baǵyttalǵan kýrstar marketpleısi. Al HR Enbek – qyzmetkerlerdiń jumys jolyn sıfrlyq esepke alý alańy. Sonymen birge jumys berýshiler úshin eńbek zańnamasynyń talaptaryn saqtaý boıynsha anonımdi ózin-ózi dıagnostıkalaý qyzmeti iske qosyldy.
Bıznes-ıdeıalardy iske asyrý úshin memlekettik granttardy alýdyń barlyq prosesin tolyq avtomattandyrý úshin engizilgen Business Enbek platformasy da bar: ótinim berýden grantty alýǵa deıin.
«Elektrondy eńbek bırjasy arqyly jumyspen qamtý salasyndaǵy memlekettik qyzmetterdi ońaı alýǵa bolady. Byltyr 126 myń adam onlaın formatta jumyssyz retinde tirkelgen. Platforma arqyly jumyssyz qalý, sýbsıdııalanatyn jumys oryndaryna jumysqa ornalasý jáne jumys kúshi tapshy aımaqtarǵa qonys aýdarý boıynsha áleýmettik tólemderge ótinish bere alasyz. Bıyl elektrondy bırja kómegimen osy qyzmetti 314,2 myńnan astam adam paıdalandy», deıdi «Eńbek resýrstaryn damytý ortalyǵy» AQ prezıdenti Dáýlet Arǵyndyqov.
Kelesi jyly taǵy bir mańyzdy element – mamandyq boıynsha sıfrlyq jolbasshy qyzmeti iske qosylmaq. Bul eńbek naryǵyndaǵy barlyq qoljetimdi mamandyq týraly aqparatty jınaqtaýyshtyń bir túri bolady. Munda árbir adam naqty nemen aınalysatynyn, ol úshin qandaı bilim qajet ekenin, ortasha jalaqyny, qandaı jumys isteıtinin bile alady.
