Tyl eńbekkeri Bısulý Ýálıeva bıyl 93 jasta. Aqsý aýylynyń týmasy, qazirgi tańda nemeresiniń qolynda turady. Bısulý ájeniń balalyq shaǵy soǵys jyldaryna tuspa-tus kelgendikten oqýshylarǵa soǵys kezindegi qıyn-qystaý zamanda qalaı ómir súrgenin, otbasyn asyraý úshin bir ýys bıdaıdy kómir astyna tyǵyp júrip ákeletinin aıtyp berdi. Osy qıyndyqtarǵa qaramastan, Bısulý áje búgingi toqsannyń tórindegi jasqa jetken.
«Elimiz tynysh bolsyn. Meniń ómirimde bolǵan qıyndyqtardy jas urpaq kórmese eken dep tileımin. Táýelsizdigimiz máńgilik bolsyn!» dep oqýshylarǵa aq batasyn berdi qarııa.
Jalǵyzbasty zeınetker Bıbinur Ibraımovaǵa zııatker eriktilerdiń yqylasy qatty áser etti. Bıbinur áje – 72 jasta, pedagogıka salasynyń ardageri. QazMÝ-di bitirgen, oblystyq muǵalimderdi jetildirý ınstıtýtynda qazaq tili men ádebıeti kabınetiniń meńgerýshisi bolyp jumys istegen. Sonymen qatar qalalyq bilim bóliminde kınotekanyń dırektory bolyp qyzmet atqarǵan.
«Aǵa urpaqqa meıirimdilik óte qajet. Ata-apalar bizdi eńbeksúıgishtikke, otbasyna, Otanǵa adal bolýǵa tárbıeleıdi. Biraq, ókinishke qaraı, biz keıde egde adamdar úshin memleket tarapynan qoldaý ǵana emes, qarapaıym kóńil bólý de mańyzdy ekenin umytyp ketemiz», deıdi NIS oqýshylary.
Oqýshylar zeınetker Lázzat ájeniń úıine de kirip shyqty. Olar osy is-shara aıasynda bir jaǵynan qaıyrymdylyq jasaǵandaryna qýanǵanymen, ekinshi jaǵynan zeınetkerlerdiń qandaı jaǵdaıda ómir súrip jatqanyna alańdaýshylyq tanytty. О́mirindegi qıyn jaǵdaıǵa baılanysty Lázzat áje baspanasyz qalǵan. Biraq aýyl ákimdiginiń kómegimen Kóktal aýylynan jańa úı salýǵa jer telimi berilgen. Qazirgi ýaqytta turǵyndardyń kúshimen irgetasy kóterilipti.
Nazarbaev zııatkerlik mektebiniń oqýshylary men ata-analary jyl saıyn ardagerlerge, qarııalarǵa kómek qolyn sozady.
Jetisý oblysy
