Qazirgi ýaqytta Qazaqstanda elektr energetıkasy úshin kúrdeli jaǵdaı qalyptasyp otyr.
«Ekonomıkaǵa qosymsha energııa kózderi qajet. Sondaı-aq bul salanyń klımatqa teris áserin azaıtý da ońaı bolyp turǵan joq. Bul – jahandyq dılemma, onyń eki jaqqa da tıimdi balansyn tabý kerek», dedi Álıhan Smaıylov.
Onyń aıtýynsha, búginde óndiriletin energııanyń 80%-dan astamy kómir men munaı sekildi qazba otyndarynan alynyp otyr.
«Aldaǵy ýaqytta bul salada aıtarlyqtaı ózgeris bola qoımaýy da múmkin. Degenmen, kómirqyshqyl gazyn aýaǵa jibermeı ustap qalý jáne ony kádege jaratý, atmosferaǵa shyǵatyn zııandy qaldyqtardy azaıtý úshin jańa tehnologııalardy qoldanýǵa basymdyq berilýde. Biz ekologııalyq balansty saqtaýǵa, jasyl jelekti, orman alqaptaryn kóbeıtýge barynsha kóńil bólemiz», dedi Premer-Mınıstr.
Sondaı-aq ol energetıkalyq ınfraqurylymdy damytý máselesin de sheshý qajet ekenin atap ótti. Mysaly, óńirlerde elektr jelileriniń tozýy shamamen 65%-dy quraıdy. Jylý elektr ortalyqtaryndaǵy jabdyqtardyń tozý deńgeıi de osyndaı. Keıbir qalalarda bul kórsetkish tipti 80%-dy quraıdy.
Premer-Mınıstrdiń pikirinshe, elektr stansııalary men qazandyqtardyń jabdyqtaryn jańartyp, jelilerdi rekonstrýksııalaý qajet. Sonymen qatar ekonomıkanyń turaqty ósýin qamtamasyz etý úshin 2035 jylǵa qaraı 10 GVt-tan astam jańa energııa qýaty qajet bolady.
«Aldymyzda kúrdeli mindetter tur. Ol úshin bizde jetkilikti resýrstar bar. Atap aıtqanda, jańartylatyn energetıkany damytýǵa jaraıtyn qajetti jer aýmaǵy, qazba baılyǵynyń mol qory, atom energetıkasyn damytý jónindegi josparymyz bar», dedi Álıhan Smaıylov.
Qorytyndylaı kele, Premer-Mınıstr kórshi elderdiń energııa júıesi arqyly energııany turaqty túrde jetkizýdi qamtamasyz etýdi, eń kóp salmaq túsetin maýsymdyq kezeńderde qajetti manevrlik qýattardy ulǵaıtý sharalaryn qabyldaýdy, sondaı-aq qazan aıynyń sońyna deıin Úkimettiń qaraýyna «ınvestısııa ornyna tarıf» saıasatyn iske asyrýdyń naqty mehanızmin usynýdy tapsyrdy.
Sonymen qatar Energetıka mınıstrligine kómir jaǵatyn elektr stansııalarynan zııandy zattardy azaıtý jáne olardy kádege jaratý tehnologııalaryn ázirlep, qoldanysqa engizý tapsyryldy.
