«Qarasora-2022» jáne «Refleks» respýblıkalyq jedel-profılaktıkalyq is-sharalaryn ótkizý barysynda Jambyl oblysy boıynsha IID Esirtki qylmysyna qarsy kúres basqarmasynyń qyzmetkerleri men QR Ulttyq ulanynyń arnaıy bólimshesiniń áskerı qyzmetkerleri Shý aýdany, Taryaıdaǵan aımaǵynda qarasora jınaý kezinde aýyldyń 51 jastaǵy turǵynyn ustady.
Jeke tintý jáne mańaıdaǵy aýmaqty tekserý barysynda ustalǵan azamattan jalpy salmaǵy 7 keliden asatyn keptirilgen marıhýana, sonymen qatar 120 keli keptirilmegen marıhýana anyqtaldy. Sondaı-aq eki gramnan astam gashısh tárkilendi. Sondaı-aq oqtalǵan 16-kalıbrli, kesilgen uńǵyly atys qarýy, oǵan qosymsha úsh patron jáne elektrondy tarazy tárkilendi.
«Atalǵan fakti boıynsha Qazaqstan Respýblıkasy Qylmystyq kodeksiniń 297-babynyń 3-bóligi «Esirtki zattardy asa iri mólsherde ótkizý maqsatynda zańsyz saqtaý» boıynsha sotqa deıingi tergeý bastaldy. Ustalǵan azamat kinásin moıyndap, Shý ýaqytsha ustaý ızolıatoryna qamaldy», dedi Jambyl oblysy IID esirtki qylmysyna qarsy kúres basqarmasynyń bastyǵy Asqar Jumabekov.
