«Qonaev ǵylym-bilim ortalyǵyna jáne stýdent jastardyń qalasyna aınalýy kerek. Qazir joǵary oqý oryndarynyń kóbi Almatyda ornalasqan. Bul halyq onsyz da tyǵyz qonystanǵan qalanyń ahýalyna óz áserin tıgizedi. Onda kólik keptelisi kóp. Jataqhana jáne qoljetimdi baspana tapshylyǵy bar. Shahardyń aýasy da lastanyp barady. Osynyń bárin eskere otyryp, Qonaevta «akademııalyq qalashyq» qurý máselesin qarastyrǵan jón dep sanaımyn», dedi Prezıdent.
Qasym-Jomart Kemelulynyń aıtýynsha, iri qalalardyń janynan ınnovasııalyq ortalyq qurǵan elder az emes.
«Árıne, jastardyń Almaty sııaqty iri qalada oqyp, jumys istegisi keletini túsinikti. Degenmen, Qonaev stýdentter úshin óte yńǵaıly qala bolar edi dep oılaımyn. Bul jaqta jataqhana salýǵa jer jetkilikti, páter jaldaý da qymbat emes. Quzyrly mınıstrlik Qonaev qalasynda Almatydaǵy joǵary oqý oryndary men kolledjderdiń bólimshesin ashý máselesin qarastyrýy kerek. Sondaı-aq, jańa zamanaýı ýnıversıtet ashý isin oılastyrýy qajet. Jalpy, álemniń iri ýnıversıtetteriniń kópshiligi iri qalalarda emes, qaladan alshaqtaý jerlerde jaıǵasqan. Bul jastardyń alańsyz bilim alýyna qolaıly jaǵdaı jasaý úshin qajet. Osy qadam óńirdegi kadr tapshylyǵyna baılanysty túıtkilderdi sheshýge de zor septigin tıgizedi», dedi Qasym-Jomart Kemeluly.
Aıta keteıik, osy rette Úkimet bul másele boıynsha jańa jylǵa deıin naqty usynys berýi kerek.
