«Almaty oblysy – elimizdegi týrıstik salanyń flagmany. Onyń basty básekelestik artyqshylyǵy - ólkeniń alýan túrliligine baı tabıǵaty. Ulttyq baılyqtyń – kórkem shatqaldardyń, jaǵalaý syzyqtary men sý aıdyndarynyń, ulttyq saıabaqtar men qoryqtardyń zańsyz jekeshelendirilýine jol berilmeıdi. Úkimet pen ákimdik mundaı faktilerge erekshe nazar aýdarýy qajet», dedi Qazaqstan Prezıdenti.
Bul rette Memleket basshysy elimizdiń kıeli sımvoly - qar barysynyń sanyn kóbeıtip, saqtaý mańyzdy máselelerdiń biri ekenin aıtty.
«Ile Alataýy óziniń biregeı jabaıy ósimdikteri men janýarlarymen tanymal jáne halyqaralyq týrısterdi tartý úshin qýatty magnıt bola alady. Halyqaralyq uıymdarmen birlese otyryp, biz taýlarymyzda elimizdiń kıeli sımvoly - qar barysynyń sanyn kóbeıtýge kúsh salamyz. Ile-Balqash tabıǵı rezervatynda jolbarystardy reıntrodýksııalaýdyń biregeı jobasy iske qosyldy. О́tken jyldyń qorytyndysy boıynsha Qazaqstannyń ulttyq parkterine kelýshiler sany 1,5 mıllıonǵa jetkeni qýantady – bul rekordtyq kórsetkish», dedi Qasym-Jomart Toqaev.
Sondaı-aq Prezıdent óńirdiń týrıstik áleýetin damytýǵa yqpal etetin birneshe faktorlardy atady.
«Oblystyń týrıstik áleýetin arttyrýǵa Tanbaly Tas shatqalynda Tengri Ultra marafony jáne Qapshaǵaı sý qoımasynda Oceanman júzý sııaqty halyqaralyq jarystardy ótkizý yqpal etedi. Qazirgi ýaqytta bul sý qoımasy aýyz sýmen jabdyqtaý, sýarý, balyq aýlaý, rekreasııa kózi retinde paıdalanylady. Úkimet Qapshaǵaı sý qoımasynyń mártebesin eldiń negizgi týrıstik nysandarynyń biri retinde belgileýi kerek. Týrızm aımaqtaǵy aýyl sharýashylyǵynyń turaqty ósýine de septigin tıgizýi múmkin. Qazaqstan sııaqty teńizge shyǵa almaıtyn Avstrııa da taý shańǵysymen qatar sharap týrızmin tabysty ilgeriletip, óziniń júzim sharýashylyǵyna jáne agrarlyq sektoryna járdemdesýde. Bul biz úshin jaqsy úlgi», dedi Memleket basshysy.
