Ǵylym jáne joǵary bilim mınıstrligi qoldaý kórsetken forýmǵa memleket jáne qoǵam qaıratkerleri, zııaly qaýym ókilderi, oqý ordasynyń oqytýshy-professorlyq quramy, stýdentter men magıstranttar qatysty.
Ál-Farabı atyndaǵy Qazaq ulttyq ýnıversıtetiniń basqarma tóraǵasy, rektor Janseıit Túımebaev sharaǵa kelgen qonaqtar men stýdentterdi qarsy alyp, forýmnyń ashylýyn jarııalady. Rektor óz sózinde Prezıdent Qasym-Jomart Toqaevtyń bıylǵy joldaýynda «Ádiletti memleket. Birtutas ult. Berekeli qoǵam» qalyptastyrý baǵyttaryn aıqyndap bergenin jáne Memleket basshysy jastarǵa erekshe nazar aýdaryp, úlken úmit artyp otyrǵanyn alǵa tartty.
Sondaı-aq jańa Qazaqstandy básekege qabiletti jastar, óz kásibin jetik meńgergen mamandar ǵana qalyptastyra alatynyn aıtyp, suranysqa ıe bilikti mamandardy daıarlaý úshin ýnıversıtette aýqymdy jumystar atqarylyp jatqanyna toqtaldy.
Forým barysynda rektor saltanatty jıynǵa qatysýshylarǵa Memleket basshysy bekitken QazUÝ qurylysynyń ekinshi kezeńiniń jobasyn tanystyrdy.
Jastar forýmyna arnaıy kelgen Prezıdent keńesshisi Málik Otarbaev: «Jastar – táýelsiz Qazaqstannyń bolashaǵy. Stýdentter sapaly bilim, sanaly tárbıe alyp, el men jerimizdiń gúldenýine úles qosýǵa tıis. Memleketimizdiń básekeli qoǵamǵa boı túzeýi sizderdiń alǵan bilimderińiz ben qabilet-qarymdaryńyzǵa baılanysty. Olaı bolsa, bárimiz Otanymyzǵa adal qyzmet eteıik», dedi.
Tanymal telejúrgizýshi Gúlnaz Álimgereı men Jol aktıvteri ulttyq sapa ortalyǵynyń mamany, áleýmettik ǵylymdar magıstri Alla Chechetkına jastardy qoǵamnyń damýyna belsendi úles qosýǵa shaqyrdy.
Forýmǵa qatysýshylardyń pikirinshe, mundaı ıgi is-sharanyń mańyzy erekshe. Jastardyń boıyna otanshyldyq rýh, patrıottyq sezim uıalatady. Elimizde bolyp jatqan jańashyl ózgerister men betburysty damýǵa talantty stýdent jastardyń erkin aralasýyna jarqyn jol ashady.
Forým jumysyna sáıkes, «Atameken» taqyrybynda dıktant jazýǵa QazUÝ-dyń 16 fakýltetinen 500-ge jýyq stýdent qatysty. Birinshi jáne ekinshi oryn fılologııa fakýltetiniń stýdentterine (Arýjan Salyqova, Aıdana Erkebaeva) buıyrsa, úshinshi oryndy mehanıka-matematıka fakýltetiniń stýdenti Halınur Satybaldıeva enshiledi.
Al «Meniń armanymdaǵy Qazaqstan» taqyrybyndaǵy esse jazý baıqaýyna qazaq tilinde 80 jumys, oryssha 10 jáne aǵylshyn tilinde jeti jumys tústi. Gran-prı júldesin jýrnalıstıka fakýltetiniń stýdenti Dinmuhamed Ataı jeńip alsa, birinshi oryndy bıologııa jáne bıotehnologııa fakýltetiniń stýdenti Altynaı Shaıahmetova ıemdendi. Ekinshi oryn fılologııa fakýltetiniń stýdenti Aınaz Esekeshke, al úshinshi oryn jýrnalıstıka fakýltetiniń 3 kýrs stýdenti Anıta Elýbaevaǵa buıyrdy.
Barlyq jeńimpazdar I, II, III dárejeli dıplommen marapattalyp, olarǵa bir rettik shákirtaqy taǵaıyndaldy.
Al sońǵy úshinshi kezeńde baıqaý jeńimpazdarynyń jumystary Ǵylym jáne joǵary bilim mınıstrligine joldandy.
