Mánshúk Mámetovanyń jasyndaı jarq etken 21 jyldyq ǵumyry tragedııaǵa toly. Buryn, Keńes kezinde sovettik Otanyn qorǵap qurban bolǵan batyr ekendigi basa aıtylyp, jeke basynyń talaıly taǵdyry múldem qozǵalmady. Táýelsizdik tańy atqan soń, Alash arystary aqtalǵan soń ǵana kóp jáıtti túsindik. Mánshúktiń «halyq jaýy» atanyp, jazyqsyz ustalyp ketken ákesi Ahmet Mamytulyn qutqarý úshin de soǵysqa suranǵany belgili boldy. Stalındik repressııanyń surqııalyǵy sondaı, qanshama arysty atyp tastaǵanymen qoımaı, ol aqparatty jasyryp baqty...
Búginde Oralda Mánshúk Mámetovanyń memorıaldyq mýzeıi jumys isteıdi. Dál osy ǵımaratta 1932-1934 jyldary Ahmet Mámetov otbasymen turǵan. «Úsh batyr qyz» memorıaldyq kesheninde Mánshúk, Álııa jáne Hıýaz ıyq tirestirip qatar tur. О́ńirde batyr qyzdy ulyqtaý sharalary jas urpaqqa patrıottyq tárbıe berý jumysymen qosa órilip, júıeli atqarylyp jatyr.
Mánshúk Mámetovanyń ǵasyrlyq toıyn atap ótýge Almatydan batyr qyzdyń nemere týysy Mámetova Sholpan Qanatqyzy men onyń uly Rýslan Keńesuly, Alash qaıratkeri Ǵabdolhákim Bókeıhanovtyń jıeni, bıologııa ǵylymdarynyń kandıdaty Sholpanaı Amanjolova, jazýshy-zertteýshi, jaqynda ǵana jaryq kórgen «Qaharmandyq anatomııasy. Mánshúktiń málimsiz maıdany» kitabynyń avtory Maqsat Táj-Murat arnaıy keldi. Mereıtoılyq sharalardy Batys Qazaqstan oblystyq tarıhı-ólketaný mýzeıi úılestirip, mándi de maǵynaly ótkizdi.
- Bıyl qazaqtyń batyr qyzy Mánshúk Mámetovanyń týǵanyna 100 jyl tolyp otyr. Surapyl soǵys jyldarynda erlermen birdeı erlik kórsetken batyr qyzdardyń esimderi el esinde. О́z eli úshin, alash qaıratkeri retinde jazyqsyz sottalyp, keıin atylǵan óz ákesin aqtaý úshin maıdanǵa attanǵan qaharman qyz nebári 21 jasynda qaza tapty. 21 jas – súıikti jar, aıaýly ana bolýǵa da úlgermegen jas qoı. 1958 jyly ákesiniń aqtalǵanyn kórmeı ketti Mánshúk apamyz. Biz osyndaı batyr qyzdarymyzdyń aldynda árqashan bas ıemiz. Olardy maqtanyshpen aıtamyz. Elimizdiń jasampaz rýhy bıik bolsyn! – dedi «Úsh batyr qyz» monýmentine gúl shoǵyn qoıǵan Batys Qazaqstan oblysynyń ákimi Ǵalı Esqalıev.
Eskertkish basynda jınalyp, estelik aıtylǵan sharadan keıin «Atameken» óner ordasynda «Qaharman qyzy qazaqtyń» atty halyqaralyq ǵylymı-tájirıbelik konferensııa ótti.
- Qazaq halqy óziniń ardaqty erlerin, aıaýly qyzdaryn árqashanda qurmetteı biledi. Tiri bolsa, Mánshúk 100-ge tolar edi deımiz. Biraq Mánshúkke sol 100 jyldyń besten bir bóliginiń ǵana ǵumyry berilipti. Sol az ǵana ǵumyrynda Otanyn álemge tanytyp, esimin tarıhqa jazyp ketti, - dedi jıynda Mánshúktiń nemere sińlisi Sholpan Mámetova tolqyp turyp.
Ǵylymı konferensııaǵa Batys Qazaqstan oblysy ákiminiń orynbasary Baqytjan Narymbetov, ólketanýshy, eńbek ardageri, Qazaqstannyń eńbek sińirgen mádenıet qaıratkeri, «Qurmet» belgisi ordeniniń jáne «Eren eńbegi úshin» medaliniń ıegeri Jaısań Aqbaı, aıtysker aqyn, Qazaqstan Jazýshylar Odaǵynyń múshesi, Qazaqstan Respýblıkasy Bilim berý salasynyń úzdigi, «Eren eńbegi úshin medaliniń» ıegeri Darıǵa Mushtanova qatysty. Máskeý halyqaralyq qatynastar ınstıtýtynyń dosenti, Reseı áskerı ǵylymdar akademııasynyń dırektory Aleksandr Ýjanov onlaın qatysyp, baıandama jasady. Sondaı-aq Almaty qalasynan tehnıka ǵylymdarynyń kandıdaty, Logıstıka jáne kólik akademııasynyń professory Keńes Júsipov, Batys Qazaqstan oblystyq Han ordasy tarıhı-mədenı, arhıtektýralyq-etnogrfııalyq mýzeı qoryǵy dırektory Ǵaısa Mahımov baıandama jasady. Konferensııa barysynda ádebıettanýshy-ǵalym, esseıst jazýshy Maqsat Táj-Murat «Neızvestnaıa voına Manshýk» kitabyn tanystyrdy. Jıyn sońynda jaryssóz ótip, qatysýshylar óz oılaryn ortaǵa saldy. Konferensııanyń sońynda qarar qabyldandy.
Batys Qazaqstan oblystyq tarıhı-ólketaný mýzeıi uıymdastyrǵan halyqaralyq konferensııanyń qonaqtary Hadısha Bókeeva atyndaǵy oblystyq qazaq drama teatrynda «Mánshúk» spektaklin tamashalady.
