26-28 qazan aralyǵynda «Qazmedıa Ortalyǵynda» ótetin basqosýda otandyq jáne sheteldik jetekshi medıamenedjerler, memlekettik qurylymdardyń ókilderi, aqparattyq platformalardyń basshylary, jýrnalıster, blogerler jáne táýelsiz sarapshylar tájirıbe almasyp, túrli talqylaýlar jasaıdy.
150-ge jýyq otandyq jáne halyqaralyq spıker qatysady. 11 elden medıa salasynyń sarapshylary kelip, pikir almasyp, paıdaly aqparattar aıtady.
Jyldyń basty taqyryby – «Jańa dáýir – jańa medıa». Meta – Astana Media Week-tiń jeke taqyryby bolady. Kompanııa ókilderi Metaǵalam týraly jan-jaqty aqparat berip, áleýmettik jelidegi trendter taqyrybynda sóz qozǵaıdy.
«Sol sekildi TikTok kompanııasynyń mamandary medıa aptalyqqa belsene qatysyp, óz oı-pikirlerin ortaǵa salyp, paıdaly aqparat beredi dep otyrmyz. Medıa aptalyqtyń birinshi kúni, paneldik sessııa aıasynda qatysýshylar Ázerbaıjan, О́zbekstan jáne Qyrǵyzstan sııaqty buqaralyq aqparat quraldarynyń ókilderimen ortaq syn-qaterlerge ortaq jaýaptardy qalaı tabýǵa bolatynyn talqylaıdy», dep jazdy Aqparat jáne qoǵamdyq damý mınıstri Darhan Qydyráli áleýmettik jelide.
Ekinshi kún «Qazaqstandaǵy jarnama medıa-naryǵy: qazirgi jaǵdaıy» taqyrybyndaǵy pikirtalas alańynan bastalady. Qazaqstannyń barlyq óńirinen kelgen medıa salanyń ókilderi óńirlik BAQ forýmynda jınalyp, aımaqtaǵy medıa salanyń trendterin, problemalyq máselelerin jáne olardyń damý joldaryn sóz etedi.
Úshinshi kúni baspasóz hatshylary úshin bólek sessııa jumysy qarastyrylǵan. Media Week dástúrli túrde baspasóz, radıo, ınternet-jýrnalıstıka salasyndaǵy úzdik jetistikteri úshin «Úrker» syılyǵynyń saltanatty rásimimen aıaqtalady.
