Qujatty QR Bas prokýrorynyń orynbasary Áset Shyndalıev usyndy. Onyń aıtýynsha, zań jobasynyń negizgi maqsaty - prokýratýranyń quqyq qorǵaý qyzmetin júıeli túrde kúsheıtý, eldegi joǵary qadaǵalaý men zańdylyq quraldaryn nyǵaıtý.
Senattyń beıindik komıtetiniń qorytyndysynda zań jobasynyń erejeleri prokýratýra organdarynyń quzyretin, qyzmetin uıymdastyrý men tártibin aıqyndaıdy:
- prokýratýra organdary qyzmetiniń quqyqtyq negizi jáne olardyń qurylymy;
- prokýratýra organdarynyń qyzmeti men uıymdastyrý qaǵıdattary;
- prokýrorlardyń ókilettikteri;
- joǵary qadaǵalaýdyń, memleket múddelerin sotta usynýdyń, qylmystyq qýdalaýdyń, ótinishterdi qaraýdyń shekteri men nysandary;
- prokýrorlar qyzmetiniń quqyqtyq kepildikteri.
Zań jobasy aıasynda Bas prokýratýra óz quzyretindegi máseleler boıynsha memlekettiń múddelerin sheteldik jáne halyqaralyq sottarda (tórelikterde) bildiredi.
Prokýrorlardyń qadaǵalaý fýnksııalaryn kúsheıtý maqsatynda prokýrorlyq qadaǵalaýdyń jańa aktisi – zań buzýshylyqtarǵa jol bermeý týraly túsindirý engizildi.
«Prokýratýra týraly» Konstıtýsııalyq Zań Respýblıkalyq referendýmnyń qorytyndylary boıynsha Konstıtýsııaǵa engizilgen ózgeristerdi iske asyrý maqsatynda ázirlendi. Prokýratýranyń negizgi mindetteri - adamdy, onyń ómirin, quqyqtary men bostandyqtaryn memlekettiń eń joǵary qundylyqtary retinde qorǵaý, sondaı-aq el aýmaǵynda zańdylyqty qamtamasyz etý. Prokýratýra organdarynyń qyzmeti alǵash ret Konstıtýsııalyq zańmen retteletinin atap ótken jón. Bul qadam eldiń quqyq qorǵaý júıesin jetildirýge mańyzdy úles qosady dep úmittenemiz», dep atap ótti Máýlen Áshimbaev.
