«Osyndaı sátte akademık Nurlan Bátpenovti eske ala otyryp, biz uly dárigerge, ǵalymǵa, densaýlyq saqtaý men ǵylymdy uıymdastyrýshyǵa, teorııalyq bilim men serpindi qoldanbaly zertteýlerdiń mańyzdylyǵyn tereń túsingen adamǵa qurmet kórsetemiz. Onyń ómir joly búgingi jas zertteýshi dárigerler úshin shabyttandyratyn úlgi ekeni sózsiz», dedi Ajar Ǵınııat bıýsttiń ashylý saltanatynda.
Mınıstr akademık N.J.Bátpenov atyndaǵy Ulttyq travmatologııa jáne ortopedııa ortalyǵy medısına ǵylymynda erekshe oryn alatynyn, bul elimizdiń táýelsizdiginiń qalyptasý kezeńinde ashylǵan alǵashqy iri ǵylymı mekemelerdiń biri ekenin erekshe atap ótti.
2015 jyly N.J.Bátpenov «Endoprotezdeýdi qoldana otyryp, urshyqbýyn hırýrgııasynda ınnovasııalyq tehnologııalardy ázirleý jáne engizý» atty jumysy úshin Qazaqstan Respýblıkasynyń Ǵylym jáne tehnıka salasyndaǵy memlekettik syılyǵynyń laýreaty ataǵyna ıe boldy.
Qazirgi ýaqytta Germanııada N. Bátpenovtiń modeli «Kaz Niito» urshyqbýynynyń endoprotezderin shyǵarý jolǵa qoıylǵan. Shyǵys Qazaqstan oblysy kásiporyndarynyń ǵylymı-óndiristik bazalaryn tarta otyryp, travmatologııa men ortopedııaǵa arnalǵan medısınalyq maqsattaǵy buıymdardy shyǵarýda.
«Nurlan Jumaǵululyn biletin adamdardyń óz esteligi bar. Onymen kezdesken kezde men onyń keremet meıirimdiligi men danalyǵyna, shyǵarmashylyǵyna jáne onyń asa zor qabiletine tańǵaldym», dep qosty mınıstr.
Ajar Ǵınııat akademık Nurlan Bátpenov atyndaǵy Ulttyq travmatologııa jáne ortopedııa ǵylymı ortalyǵynyń ujymyn jáne aty ańyzǵa aınalǵan qazaqstandyq dárigerdiń otbasyn eskertkishtiń ashylýymen quttyqtap, onyń isiniń laıyqty jalǵasyn, klınıkanyń jas dárigerlerine úlken kásiptik bıikterge jetýin tiledi.
