«Búgin sizdermen shejiresi baı, qazynasy mol Atyraý jerinde kezdesip otyrǵanyma qýanyshtymyn. Qoınaýy qara altynǵa toly bul aımaq elimizdiń ekonomıkasynyń damýyna eleýli úles qosýda. Aq Jaıyqtyń atyraby árdaıym Qazaqstannyń ekonomıkalyq tiregi bolyp keledi. Shyn máninde, táýelsiz el retinde aıaqqa nyq turýymyzǵa Atyraý turǵyndarynyń róli mańyzdy boldy», dedi Prezıdent.
Onyń aıtýynsha, búginde munaıdyń baǵasy edáýir joǵary.
«Osydan 20 jyldan astam ýaqyt buryn men Úkimet basqarǵan kezde munaıdyń baǵasy 10-15 dollar edi. Iri ken oryndary ıgerilmegen, zamanaýı tehnologııa kele qoımaǵan shaq bolatyn. Munaıdy eksporttaý joldary shekteýli, óte qıyn zamandy bastan ótkerdik», dedi Qasym-Jomart Toqaev.
