«Budan bólek, jol boıyndaǵy ınfraqurylymdy damytýǵa basa mán bergen jón. Ulttyq munaı-hımııa kesheniniń alǵashqy kezeńi iske qosylǵanda «Atyraý – Dossor» jolyndaǵy kólik qozǵalysy kúrt kóbeıedi. Sondyqtan quzyrly organdar bul joldy III sanattan I sanatqa aýystyrý máselesin tez arada sheshýge tıis. Atyraý aımaǵyndaǵy aýyldar bir ortalyqtan beriletin sý júıesine qosylmaǵan. Kóptegen eldi mekenniń turǵyndary taza sýdy keıde belgili bir ýaqytta ǵana alady», dedi Qasym-Jomart Toqaev.
Mundaı ahýal ınfraqurylym jelisi ábden tozǵandyqtan týyndap otyr.
«Mysaly, Atyraýdy jáne Maqat aýdanyn sýmen qamtamasyz etetin tazartý júıesi apatty jaǵdaıda tur. Aldaǵy bes jylda tushy sý tapshylyǵy 40 paıyzǵa jetýi múmkin. Sondyqtan, Úkimet pen oblys ákimdigi sýmen qamtamasyz etý júıesin jańǵyrtýǵa basa nazar aýdarýy qajet», dedi Prezıdent.
