«Medısınalyq mekemelerdiń basshylarymen medkómektiń sapasyn arttyrý jáne medortalyqtardy odan ári jaraqtandyrý máselesin talqyladyq. Osyǵan deıingi kezdesýde medısına qyzmetkerlerimen ári turǵyndarymyzben atqarylýy tıis jumys jospary jasalǵan. Olardyń basym bóligin oryndadyq», dep jazdy ákim Instagram paraqshasynda.
Kezdesý barysynda mednysandar salý jáne jóndeý, kadrlardy daıarlaý, obektilerdi tolyq jaraqtandyrý, «Qaýipsiz aýla» jobasyn engizý syndy máseleler qozǵalǵan.
Sondaı-aq qala ákimi talqylanǵan máseleler men atqarylǵan jumystar týraly jazdy.
Birinshi. Densaýlyq saqtaý júıesiniń ınfraqurylymyn damytý
Elordanyń aýqymdy jobalarynyń biri TJ aýrýhanasynyń (№3 kópsalaly qalalyq aýrýhana) «Ramada Plaza» ǵımaratyna kóshýi. Eski TJ aýrýhanasynyń aýmaǵyna jańa perınataldyq ortalyq salynady. Almaty aýdany – №1 kópsalaly qalalyq aýrýhanasynyń janynan taǵy bir perınataldyq ortalyq turǵyzylady.
Birqatar medısınalyq mekemege jóndeý júrgizý, «Jaǵalaý-3» jáne «Nurly jol» vokzaly aýdanynda ambýlatorııalyq-emhanalyq keshenderiniń, Kóktal-1, Prıgorodnyı, Telman jáne t.b. eldi mekenderde alǵashqy medısınalyq-sanıtarlyq kómek ortalyqtarynyń qurylysy josparlanǵan.
Ekinshi. Medısına qyzmetkerlerine jaǵdaı jasaý
Kelesi jyly dárigerlerdiń jalaqysyn taǵy 35%-ǵa, al orta býyn medısına qyzmetkerleriniń jalaqysyn 10%-ǵa arttyrý josparlanǵan.
Kadrlardy jumyldyrý úshin arnaıy granttar bólinedi. Sondaı-aq medısına qyzmetkerlerine arnap jataqhana salý josparlanǵan.
Úshinshi. Materıaldyq-tehnıkalyq baza
Sońǵy 3 jylda medısına mekemeleri 3 myńǵa jýyq arnaıy jabdyqpen jabdyqtalǵan. Olar: ýltradybystyq apparattar, kompıýterlik tomograftar, jeldetkishter, jyljymaly flıýorografııalyq keshender, sıfrly rentgenografııalyq júıeler jáne t.b. Bul jumys ári qaraı da jalǵasyn tabady.
Tórtinshi. Jedel medısınalyq járdem stansııasy
Bıyl jedel medısınalyq járdem stansııasyna 55 arnaıy mashına berilgen.
