Baıqaýǵa elimizdiń jalpy bilim beretin mektepteriniń 3-10-synyp oqýshylarynan aýdandyq, qalalyq, oblystyq irikteýlerden ótken jalpy 97 myńnan asa bala qatysty. Olar 4 sanat boıynsha baq synady. Atap aıtqanda «Ertegiler áleminde» taqyrybynda 3-4-synyp oqýshylary «Qazaq ertegileri» jáne «Alpamys batyr» kitaptary; «Kel, balalar, oqylyq!» taqyrybynda 5-6 orta synyptaǵy oqýshylary «Men – apamnyń balasymyn» jáne «Aǵaıyndy Grımmder ertegileri» atty kitaptar, «Ǵasyrlar tarıhty jyrlaıdy» taqyrybynda 7-8-synyptaǵy balalar «Ushqan uıa» jáne «Gýllıverdiń saıahaty» kitaptary; «Uly dala epostary» jáne «Uly dalanyń dańqy» taqyrybynda 9-10-synyp oqýshylary I.Esenberlınniń «Kóshpendiler. Almas qylysh» jáne D.Defonyń «Robınzon Krýzo» kitaptary boıynsha bilimin ortaǵa saldy.
Saltanatty rásimge Aqparat jáne qoǵamdyq damý vıse-mınıstri, Parlament depýtattary, Qazaqstandaǵy IýNISEF ókilderi, qoǵam qaıratkerleri, aqyn-jazýshylar men jýrnalıster qatysty.
Alǵy sóz alǵan Aqparat jáne qoǵamdyq damý vıse-mınıstri Danııar Qadyrov: «Respýblıkalyq balalar oqýyna elimizdiń túkpir-túkpirinen súrinbeı ótken júzden júırik qatysýshylarymyzdy baıqaýdyń mejesine jetýimen shyn júrekten quttyqtaımyn. Oraıy kelip turǵanda barshańyzdy tuǵyryna qaıta qonǵan ulttyq merekemiz Respýblıka kúnimen de quttyqtaımyn. Bul baıqaý kitap oqý mádenıetimen qatar memlekettik tildiń jas býyn ortasynda keń taralýyna úles qosady. Atalǵan áıgili týyndylar adamnyń ómir jolynda ólsheýsiz azyq bolyp, parasatty, kemel jastardy qalyptastyrýǵa yqpal etip keledi. Osyndaı azamattarmen birge biz Ádiletti Qazaqstandy jáne qoǵamdaǵy izgi qundylyqtardy qalyptastyramyz», dedi.
Parlament Májilisiniń depýtattary Saýytbek Abdrahmanov men Amanjol Áltaı, Qazaqstandaǵy IýNISEF basshysynyń keńesshisi Baǵdad Qulnazarov, Jazýshylar odaǵynyń músheleri, aqyn-jazýshylar Serik Negımov, Sharhan Qazyǵul, Dıhan Qamzabekuly, Qýanysh Jıenbaı jáne Roza Muqanovalar tıisti nomınasııalar boıynsha jeńimpazdar men júldegerlerdi baǵaly syılyqtarmen marapattady.
Saltanatty rásim barysynda eń belsendi qatysýshylarǵa alǵys hattary men Marwin sertıfıkattary tabystaldy. Sońy konsertke ulasqan baıqaýdyń basty maqsaty – balalar men jasóspirimderdiń kitap oqýǵa degen qyzyǵýshylyǵyn arttyrý, qazaq jáne shetel ádebıetin, aqyn-jazýshylardyń shyǵarmalaryn tereń zertteýge tartý jáne óskeleń urpaqtyń boıynda patrıottyq sezimdi qalyptastyrý.
