Túsindire keteıik, ıntercheındj degenimiz – saýda-servıstik kásiporyndarǵa qyzmet kórsetetin ekvaıer-bankter qolma-qol aqshasyz tólemderdi qabyldaý kezinde tólem kartasynyń emıtent-bankke tólenetin ekvaırıngtik komıssııanyń bir bóligi. Kelisimniń talaptaryna sáıkes, Qazaqstanda jumys isteıtin tólem kartalarynyń halyqaralyq júıeleri ıntercheındj mólsherlemelerin birden 2 ese tómendetýge mindetteledi.
«Shekti mólsherlemeler tómendegen kezde kezeń-kezeńimen tómendetý tásili qoldanylady. Birinshi kezeń 2024 jyly 1 qańtarda, al ekinshi kezeń 2025 jyly 1 qańtarda bastalady: jappaı segmentte (Classic, Gold jáne basqalary) birinshi kezeńde shekti mólsherlemeler qazirgi mólsherlemeden (1,80%-2,0%-dan) 1,50%-ǵa deıin, ekinshi kezeńde 1,0%-ǵa deıin tómendeıdi; premıým segmentte (Platinum, World jáne basqalary) birinshi kezeńde qazirgi mólsherlemelerden (shamamen 2,40%-dan) 1,80%-ǵa deıin, ekinshi kezeńde 1,20%-ǵa deıin tómendetý kózdeledi; sýper premıým segmentte (Infinite, World elite, Diamond jáne basqalary) birinshi kezeńde mólsherlemeler qazirgi mólsherlemeden (shamamen 2,45%-dan) 2,0%-ǵa deıin, ekinshi kezeńde 1,40%-ǵa deıin tómendeıdi», delingen Ulttyq bank habarlamasynda.
Qolma-qol aqshasyz kartalyq tólemder boıynsha bankaralyq komıssııalardyń tómendeýi tólem ındýstrııasynyń odan ári damýyna oń yqpal etedi jáne bank komıssııalaryn tóleýge bıznes sýbektileriniń shyǵyndaryn qysqartady. Bul tásil qolma-qol aqshasyz tólemderdi odan ári damytyp, «kóleńkeli ekonomıkanyń» azaıýyna oń áserin tıgizedi.
