Atalǵan jarysta Qazaqstan qurama komandasy óte jaqsy óner kórsetýde. Alǵashqy kúni asa jeńil salmaqta beldesken Aqmaral Naýatbek (J-2) óz jankúıerlerin qýantty. Barlyq qarsylastaryn sypyra utqan ol aqtyq synda Paralımpııa oıyndarynyń eki dúrkin júldegeri, kóptegen asa iri halyqaralyq jarystyń jeńimpazy fransııalyq Aýrerıes Martınet Sandrındi san soqtyrdy. Osylaısha, Aqmaraldyń esimi sporttyń osy túri boıynsha áıelder arasynda álem chempıony atanǵan Qazaqstannyń tuńǵysh balýany retinde tarıhta qaldy. Komandalyq áriptesiniń jeńisti jolyn Erǵalı Shámeı (J1) jalǵastyrdy. 73 kılo salmaq dárejesinde kúsh synasqan qandasymyz fınalda germanııalyq Sass Lenarttyń aıaǵyn kókten keltirip, bas júldeni qanjyǵasyna baılady.
Sondaı-aq komandamyzdyń qorjynynda taǵy úsh qola medal bar. Onyń ıegerleri – Daıana Fedosova (J2 – 57 kılo), Oljas Orazalyuly (J2 – 73 kg) jáne Janbota Amanjol (J2 -90 kılo). Bakýdegi básekeler búgin óz máresine jetedi.
