1977 jyldyń 24 aqpanynda AQSh-tyń Mıchıgan shtatyna qarasty Grand-Rapıds qalasynda dúnıege kelgen Floıd Meıvezer jaıynda tórtkúl dúnıe jankúıerleri alǵash ret 1996 jyly Atlantada alaýy tutanǵan XXVI jazǵy Olımpııa oıyndary kezinde estigen edi. Atalǵan jarystyń tusaýkeser kezdesýinde ol Baqtııar Tilegenovti tize búktirdi. Sol kezde Azııa chempıony degen dardaı ataǵy bar qandasymyzdyń 19 jastaǵy esimi kópshilikke beımálim bylǵary qolǵap sheberine ese jibergenine kóńilimiz tolmaǵan edi. Biraq munymyz beker eken. Odan keıin jas daryn armenııalyq Artýr Gevorkıan men kýbalyq Lorenso Aragondy jolynan yǵystyrdy. Aqyry jartylaı fınalda Bolgarııanyń dańqty boksshysy, úsh dúrkin álem jáne Eýropa chempıony Serafım Todorovqa bir ǵana upaı aıyrmashylyǵymen utylǵan Floıd qola medaldy moınyna ildi.
Atlanta Olımpıadasy aıaqtalǵan bette kásipqoı rıngte kúsh synasýǵa bel býǵan AQSh boksshysy sodan keıin birde-bir ret jeńilistiń kermek dámin tatqan emes. 1996-2021 jyldar aralyǵynda 50 ret sharshy alańǵa shyqqan ol barlyq básekede basym tústi. 27 qarsylasyn nokaýtqa jiberdi. Meıvezerden taıaq jegender arasynda Dıego Koralles, Hose Lýıs Kastılo, Demarkýs Korlı, Artýro Gattı, Sharmba Mıtchell, Zab Djýda, Karlos Manýel Baldomır, Oskar de la Hoıa, Rıkkı Hatton, Hýan Manýel Markos, Sheın Moslı, Vıktor Ortıs, Mıgel Kotto, Robert Gerrero, Saýl Alvares, Markos Maıdana, Mennı Pakıao syndy dańqtary jer jarǵan boksshylar bar. Ol az deseńiz, osydan bes jyl buryn Las-Vegastaǵy «Tı-Mobaıl Arenada» Floıd erejesiz jekpe-jektiń has sheberi Konor Makgregordy tehnıkalyq nokaýtpen utty. Shırek ǵasyrǵa jýyq ýaqyt boıy qarsy kelgenderdi qoǵadaı japyryp, HHI ǵasyrdyń teńdessiz boksshysy dep tanylǵan Meıvezerdiń úzdikter reıtınginde kósh bastap turýǵa laıyqty ekeni esh daý týǵyzbasa kerek.
Úzdikter tiziminde ekinshi oryndy Rıkardo Lopes ıelenýde. Jeńil salmaq dárejelerinde óner kórsetken Meksıkanyń marqasqasy 1985-2001 jyldar aralyǵynda 52 kezdesý ótkizip, 51 ret jeńiske jetti. 38 básekede aıqyn basymdyq tanytty. 1998 jyly nıkaragýalyq Rosendo Alvarespen bolǵan jekpe-jekte teń esep tirkeldi. Negizi Lopes ony da utatyn edi. Biraq 8 raýndta amerıkalyq sportshynyń qabaǵy jarylyp ketti. Báseke dereý toqtatyldy. Tóreshiler biraz oılana-tolǵana kele joǵarydaǵydaı sheshim qabyldady.
Úshinshi satyǵa Rokkı Marchıano jaıǵasty. HH ǵasyrdyń bel ortasynda sharshy alańdy shaıqaǵan AQSh boksshysy 49 kezdesýdiń barlyǵyn óz paıdasyna sheshti. 43 qarsylasyn esinen tandyrdy. Sondaı-aq TOP-10 boksshynyń qataryna Djımmı Berrı (59-0-10), Djo Kalzage (46-0), Andre Ýord (32-0), Terens Kroýford (38-0), Taıson Fıýrı (32-0-1), Sven Ottke (34-0) jáne Aleksandr Ýsık (20-0) syndy sańlaqtar endi.
