Sporttyq sambodan ótken jarysta qazaqstandyqtar arasynan eń úzdik nátıjege Qaıyrgeldi Aıdynbaı qol jetkizdi. 58 kılo salmaq dárejesinde synǵa túsken Atyraý oblysynyń ókili jýyrda Izraıldiń Bat-Iаme qalasynda jaǵajaıdaǵy sambodan ótken álem chempıonatynda qarsylas shaq keltirmeı, bas júldeni oljalaǵan edi. Sonyń aldynda ǵana ol Lıvannyń Djýnııa shaharynda Azııa chempıony atandy. Bishkekte de Qaıyrgeldi tamasha óner kórsetip, aqtyq synǵa deıin alqynbaı jetti. Alaıda sheshýshi synda Reseıdiń áıgili samboshysy eki dúrkin álem chempıony, Álem kýboginiń ıegeri, Eýropa oıyndarynyń kúmis júldegeri Saıan Hertekke áli jetpedi. Bul jarysty Aıdynbaı kúmis medalmen qorytyndylady.
Alataýdyń arǵy betkeıinde Almaty oblysyndaǵy Kerbulaq aýdanynyń eki birdeı samboshysy qola medaldy moıyndarynda jarqyratty. Áıgili bapker Baqyt Qoqysbekovtiń shákirti Dildásh Quryshbaevadan bul joly biz altyn medal kútken edik. О́ıtkeni bul sportshynyń júrip ótken joly jankúıerlerdiń kóz aldynda. Osydan 10 jyldan asa ýaqyt buryn ol ulttyq qurama sapyna ilikken edi. Sol aralyqta álem chempıonatynda alty ret jeńis tuǵyryna kóterildi. Tarqatyp aıtsaq, 2013-2021 jyldar aralyǵynda Dildásh úsh kúmis pen úsh qola medal ıelendi. Odan bólek, Azııanyń alty dúrkin chempıony degen ataǵy taǵy bar. Osy jarysqa ol tek altyn alamyn dep attanǵan edi. Alaıda 72 kılo salmaqta óner kórsetken Quryshbaeva alǵashqy aınalymda oıda-joqta rýmynııalyq Volha Maleıdadan utylyp qaldy. Sodan keıin mysyrlyq Samah Abdellatıf pen ózbekstandyq Mahıgýl Kamıljanovanyń aıaǵyn kókten keltirip, qola medaldy moınyna ildi. Bul – Dildáshtiń álem chempıonattarynda jeńip alǵan jetinshi júldesi! Osyndaı tamasha kórsetkishke qol jetkizgen balýan qyzymyzǵa alǵystan basqa aıtarymyz joq.
Saryózek óńiriniń taǵy bir týmasy Arnur Qýataıdyń da esimi sportsúıer qaýymǵa jaqsy tanys. Birqatar baıraqty básekede júlde alǵan ol Bolat Qojahmetov pen Berik Jetpisbaev syndy bilikti bapkerlerdiń qol astynda jattyǵady. Álemdik dodada 71 kılo salmaqta kúsh synasqan Arnur qola medal enshiledi. Tusaýkeser kezdesýinde belorýssııalyq Vladıslav Saıapovty san soqtyrǵan qandasymyz kelesi kezeńde reseılik Shamıl Zılfıkarovqa jol berdi. Jubanysh beldesýinde mońǵolııalyq Altynshah Davdondy utqan Qýataı úshinshi oryn úshin tartysta bolgarııalyq Angel Angelovtan aılasyn asyrdy.
54 kılo salmaq dárejesinde sheberlik baıqasqan Gúldana Álmuhanbetova byltyr Tashkentte uıymdastyrylǵan álem chempıonatynda altynnan alqa taqqan edi. Bul joly ol dál sol bıikten kórenetin shyǵar dep úmittendik. Biraq bul joly Gúldana qola medaldy qanaǵat tutty. Sol sekildi asa aýyr salmaqta kúresken Araılym Ábenova da dál sol mejeden kórindi.
Bishkektegi básekede Reseı sportshylary tabysty óner kórsetti. Olar 8 altyn, 2 kúmis jáne 2 qola medal oljalap, jalpykomandalyq esepte jeke-dara kósh bastady. Belarýs (1 altyn+2 kúmis+2 qola) ekinshi oryndy ıelense, úzdik úshtikti Túrikmenstan (1+1+2) túıindedi. Tórtinshi jáne besinshi satyǵa Qyrǵyzstan (1+1+2) men Grýzııa (1+1+2) jaıǵasty. Taǵy bir altyndy Bosqyndar komandasy sapynda óner kórsetken Venesýlanyń ókili Marııa Gedes oljalady. Odan keıingi satylarǵa Nıderland (0+2+0), Qazaqstan (0+1+4) jáne Armenııa (0+1+1) quramalary jaıǵasty.
Jalpy, álem chempıonatynda Qazaqstan samboshylary 1992 jyldan beri óner kórsetip keledi.
Sonymen qatar Bishkekte jaýyngerlik sambodan da túrli tústi júldeler sarapqa salynda Bul jarysta Qazaqstan quramasynyń qorjynyna 2 kúmis pen 3 qola medal tústi. Bas júldeni oljalaýǵa Áset Anarbaev (71 kılo) pen Asylbek Smaıylovtyń (79 kılo) tamasha múmkindikteri boldy. Biraq olar sheshýshi tusta súrindi. Áset qyrǵyzstandyq Daıarbek Karııaevten utylsa, Asylbek ızraıldik Tarren Abbasovtan jeńildi. Nátıjesinde, olar kúmispen kúpteldi. Al Mıras Ýálıev (58 kılo), Aıbek Sámetaev (88 kılo) jáne Raıhan Mádı (98 kılo) qola medaldy qorjynǵa saldy.
