Qor taratqan aqparatqa súıensek, zeınetaqy jınaqtaryn alý qarqyny tómendep kele jatyr. Mysaly, 2022 jyldyń qazan aıynda 7,5 mlrd teńge somasyna 2 993 ótinish oryndaldy. Salystyrý úshin aıtar bolsaq, 2021 jyldyń qazan aıynda 87,8 mlrd teńge somasyna 35 434 ótinish oryndalǵan edi.
Oryndalǵan ótinishterdiń eń kóbi Almaty qalasynyń (17,61 paıyz), Astana qalasynyń (14 paıyz), Mańǵystaý oblysynyń (10,33 paıyz) turǵyndary tarapynan joldanǵan.
«Salymshylar (alýshylar) ózderiniń jınaqtaryn paıdalanatyn maqsattardy taldaı otyryp, kelesi negizgi baǵyttardy atap ótýge bolady. Kóbinese (barlyq ótinishterdiń shamamen 36%) azamattyq-quqyqtyq mámileler boıynsha menshikke turǵyn úı satyp alý (túpkilikti esep aıyrysý) jáne jeke turǵyn úı salý (menshiginde jer ýchaskesi bolǵan jaǵdaıda) jıi tirkeldi. О́tinishterdiń 21 paıyzdan astamy salymshylardyń (alýshylardyń) turǵyn úı qurylys jınaqtary baǵdarlamalary boıynsha zeınetaqy qarajatyn paıdalanýy úshin oryndaldy. О́tinishterdiń taǵy 21 paıyzy odan ári jınaqtaý úshin turǵyn úı qurylys jınaq aqshasyna salymdy tolyqtyrý maqsatynda oryndaldy. О́tinishterdiń shamamen 20 paıyzy turǵyn úı satyp alýǵa (onyń ishinde ıslam bankiniń qarjylandyrýy sheńberinde) ıpotekalyq turǵyn úı qaryzyn alý úshin bastapqy jarnany engizýge, ıpotekalyq turǵyn úı qaryzy boıynsha bereshekti tolyq jáne ishinara óteýge jáne ony qaıta qarjylandyrýǵa baǵyttaldy», delinedi qor dereginde.
Atap óterligi, ýákiletti operatorlardan salymshylardyń (alýshylardyń) jeke zeınetaqy shottaryna (JZSh) shamamen 456,3 mlrd teńge qarajat qaıtaryldy. Sebebi suranym ıesiniń ótinishi jáne ózge de sebeptermen qazaqstandyqtar birjolǵy zeınetaqy tólemderin belgilengen merzimde turǵyn úı jaǵdaıyn jaqsartýǵa paıdalanbaǵan.
Sonymen qatar BJZQ emdelýge berilgen 311,1 mlrd teńgege 395 730 ótinishti oryndady. Bul rette alýǵa bolatyn ortasha soma – shamamen 0,8 mln teńge. 2022 jyldyń qazan aıynda shamamen 3 mlrd teńge somasyna 2 362 ótinish oryndalǵan (salystyrý úshin: ótken jyldyń atalǵan aıynda – 10,8 mlrd teńge somasyna 12 462 ótinish).
Kóbinese (ótinishterdiń 96 paıyzdan astamy) qazaqstandyqtar ózderiniń jınaqtaryn medısınalyq maqsattarda stomatologııalyq qyzmetterge jumsapty. О́tinishterdiń tek 2,8 paıyzy oftalmologııalyq qyzmetterdi alý maqsatynda oryndalǵan. Qalǵan medısınalyq baǵyttarǵa zeınetaqy jınaqtarynyń 1 paıyzdan astamy qoldanyldy.
2022 jyldyń 1 qarashasyndaǵy jaǵdaı boıynsha, ınvestısııalyq portfeldi basqarýshylarǵa (IPB) 8,7 mlrd teńge aýdarylyp, BJZQ 5 891 ótinishti oryndady. Bul rette biregeı ótinish berýshilerdiń jalpy sany – 3 379 adam. Bul óz jınaqtarynyń bir bóligin birneshe basqarýshy kompanııaǵa berýge sheshim qabyldaǵan salymshylar bar ekenin bildiredi. Aýdarymnyń ortasha somasy – 1,5 mln teńge.
