Eýrazııalyq ekonomıkalyq odaq týraly kelisim-shartqa qol qoıyldy

ASTANA. 29 mamyr. Búgin Astanadaǵy Táýelsizdik saraıynda Qazaqstan, Reseı, Belarýs elderiniń Prezıdentteri Eýrazııalyq ekonomıkalyq odaq qurý týraly shartqa qol qoıdy. Bul týraly «QazAqparat» habarlady. Bul tarıhı basqosýǵa, ıaǵnı, Eýrazııalyq ekonomıkalyq odaq qurý týraly shartqa qol qoıý rásimine áriptes memleketterdiń Parlament depýtattary, zııaly qaýym jáne qoǵamdyq uıym ókilderi qatysty. Shartta halyqaralyq uıymdarǵa tán bazalyq aspektiler, memleketterdiń teńdigi, aýmaqtyq tutastyǵy, sondaı-aq, múshe-memleketterdiń saıası qurylymynyń ereksheligin qurmetteý qaǵıdattary qamtylǵan. Atalǵan odaq jónindegi basty qujat 2015 jyldyń 1 qańtarynan bastap kúshine enedi. Taǵy bir aıta keter jáıt, shartta sheshim qabyldaý kezindegi konsensýs mehanızmi barlyq deńgeıde eskerilgen. Sonymen qatar, taraptardyń Odaq organdaryndaǵy kadr saıasaty aıasynda teń qamtylýy qaǵıdaty da qarastyrylǵan. Joǵary Eýrazııalyq ekonomıkalyq keńestiń shaǵyn quramdaǵy otyrysynda Memleket basshysy Nursultan Nazarbaev: «Shart saýatty, teńgestirilgen, oǵan qatysýshy memleketterdiń barlyǵynyń múddelerin esepke ala otyryp jasaldy. Aýqymdy jumys atqaryldy. Kelispeýshilikter de barshylyq bolǵanymen, biz barlyq taraptardy qanaǵattandyratyn ortaq konsensýsqa kelip otyrmyz», – dedi. Joldybaı Bazar. Derekkóz: «QazAqparat». Foto: «QazAqparat».