Eýrazııalyq ekonomıkalyq odaqqa iri ekonomıkalyq oıynshylar qyzyǵýshylyq tanytýda

ASTANA. 29 mamyr. Búginde biz birlesip, ekonomıkalyq damýdyń qýatty, tartymdy ortalyǵyn, 170 mıllıonnan astam halyqty biriktiretin iri óńirlik naryqty qurýdamyz. Reseı prezıdenti Vladımır Pýtın Eýrazııalyq ekonomıkalyq odaq qurý týraly shartqa qol qoıý barysynda osylaı dedi. Bul týraly akorda.kz habarlady. Vladımır Pýtın: «Álemdik arenada halyqaralyq quqyq sýbektisine tolyq kólemde ıe jáne Dúnıejúzilik saýda uıymy ustanymdaryna saı jańa ekonomıkalyq uıym paıda bolady. Odaqtyń ultústilik organdaryna jekelegen ókilettilikterdi berý bizdiń elderimizdiń egemendegine túbegeıli zııan tıgizbeıtindigi mańyzdy», – dedi. Sondaı-aq, ol Eýrazııalyq ekonomıkalyq odaqqa álemdegi iri oıynshylar qyzyǵýshylyq tanytyp otyrǵanyn da atap ótti. Budan bólek, Reseı prezıdenti: «Eýrazııalyq ekonomıkalyq odaq elderinde damyǵan ónerkásip, ındýstrııalyq baza, qýatty kadrlyq, ıntellektýaldyq, mádenı áleýet bar. Geografııalyq jaǵdaıymyz bizge tek óńirlik qana emes, jahandyq ta mańyzy bar kólik-logıstıkalyq baǵdarlar qalyptastyrýǵa, Eýropa men Azııanyń aýqymdy saýda joldaryn ózimizge «baǵyndyrýǵa» múmkindik beredi. Osynyń barlyǵy – bizdiń birlestigimizdiń básekege qabilettiliginiń, onyń jedel ózgerip jatqan ári kúrdeli álemdegi qarqyndy damýynyń kepili, – dedi. Joldybaı Bazar. Derekkóz: akorda.kz. Foto: Orynbaı Balmurat.