Eýrazııalyq ekonomıkalyq odaq qurý týraly shartty ratıfıkasııalaý qajet

ASTANA. 29 mamyr. Memleket basshysy Eýrazııalyq ekonomıkalyq odaq qurý týraly kelisim-shartty ratıfıkasııalaý ýaqytyn birizdendirýdi usyndy. Bul týraly «QazAqparat» habarlady. Astanada ótip jatqan Joǵary eýrazııalyq ekonomıkalyq keńes ústinde Nursultan Nazarbaev: «Qujatqa qol qoıǵannan keıin, ony parlamentterimizde ratıfıkasııalaý qajet. Sondyqtan, bizdiń depýtattyq korpýstarymyzdyń aldynda qazirgi kezdegi eń mańyzdy ári keń aýqymdy Halyqaralyq qujattardyń biri bolyp sanalatyn bizdiń búgingi kelisim-shartymyzdy bekitýde úlken jumys kútip tur», – dedi. Sondaı-aq, ol: «Men bul jumystyń ýaqytyn úsh elde de birizdendirip, odaqtyń 2015 jyldyń 1 qańtarynda tolyq jumysqa kirisýin qamtamasyz etýdi usynamyn», – dedi. Memleket basshysy Keden odaǵyna múshe elderdiń parlamentterinde birigip jumys isteýdiń mol tájirıbesi bar ekenin atap ótti. Prezıdent: «Bizdiń parlamentterimizde bir ýaqytta ratıfıkasııalaý tájirıbesi bar. Sondyqtan, meniń oıymsha, depýtattarymyz bul qyzmetti abyroımen atqaryp shyǵady, bul jolda biz olarǵa barlyq qujattardy daıyndaýda kómektesemiz», – dedi. Joldybaı Bazar. Derekkóz: «QazAqparat». Foto: Orynbaı Balmurat.