«Mektep jáne kolledj muǵalimderimen birge bilim berý salasyn odan ary damytý, oqý oryndaryn salý, ınklıýzııa kabınetterin ashý, granttar bólý sekildi t.b. máselelerdi talqyladyq. Oqý oryndarynyń qurylysyn júrgizýge, bilim berý sapasyn arttyrýǵa, jumys isteý úshin qolaıly jaǵdaı jasaýǵa birdeı kóńil bólemiz», dep jazdy ákim.
Altaı Kólginovtyń aıtýynsha, salaǵa jas mamandardy tartý maqsatynda bilim granttarynyń sany jyl saıyn ulǵaıyp keledi. Máselen, 3 jyl ishinde túlekterge 1400 grant berilgen bolsa, bıyl 1 myńnan astam bilim granty bólindi.
«Áleýmettik nysandar salý – júıeli jumysymyzdyń mańyzdy baǵyttarynyń biri. Osy maqsatta 420-dan astam jer ýchaskesi belgilendi: mektep salý úshin – 158 ýchaske, balabaqshalar úshin – 185, medısınalyq ortalyqtar úshin (emhanalar, perzenthanalar, ońaltý ortalyqtary) – taǵy 78 ýchaske. Áleýmettik nysandardy salý úshin jer ýchaskeleriniń sanyn jyl saıyn ulǵaıtamyz», dedi Altaı Kólginov.
Qala ákimi atap ótkendeı, 2019 jyldan bastap 93 myń oqýshyǵa arnalǵan (2 aýysymda) 45 mektep salyndy. Onyń 9-y bıylǵy oqý jylynda ashylady. «Jaıly mektep» ulttyq jobasy aıasynda 84 myńnan astam oqýshyǵa arnalǵan (2 aýysymda) 23 asa iri mektepti jobalaý jumysy bastalyp ketti. Olardyń qurylysy kelesi jylǵa josparlanǵan.
Sol sııaqty 40-qa jýyq oqý ornynda (mektepter, balabaqshalar, kolledjder) kúrdeli jáne aǵymdaǵy jóndeý jumysy júrgizildi, mektep kitaphanalarynyń 38%-y jańǵyrtyldy, birqatar qosymsha bilim berý ortalyqtary, onyń ishinde shahmat úıirmeleri ashyldy.
«Erekshe qajettiligi bar jandardyń kedergisiz ómir súrýi úshin jaıly orta qurý jumysyn jalǵastyramyz. Bıyl qyrkúıek aıynan bastap kórý qabileti buzylǵan balalarǵa arnalǵan 4 arnaıy synyp ashtyq. Al jeltoqsan aıynda aýtızmmen aýyratyn balalardy qoldaý ortalyǵyn ashýdy josparlap otyrmyz. Joǵaryda atalǵan sharalardyń bárin ári qaraı da damytýdy jalǵastyramyz. Bilim berý salasynyń mamandarymen ótetin turaqty kezdesýler problemalardy jyldam sheshýge, sol sııaqty josparymyzǵa mindetter engizýge múmkindik beredi», dep qorytyndylady elorda ákimi.
