Barsha Alash jurty 18 jeltoqsanda AQSh-tyń Las-Vegas qalasynda jalaýy jelbireıtin jarystaǵy Damır Ismaǵulov pen Arman Sarýkıannyń jekpe-jegin kórýge aıryqsha qushtarlyq tanytyp otyr. Jeńil salmaqta kúsh synasatyn bul sportshylardyń ekeýi de UFC-de ózderin moıyndatyp úlgerdi. Qazirgi kezde 31 jastaǵy Orynbordyń qazaǵy atalǵan promoýshenniń reıtınginde 11-oryndy ıelenýde. Qandasymyzdyń rekordy – 25 kezdesý, 24 jeńis, 13 nokaýt. Reseıdiń namysyn qorǵap júrgen 26 jastaǵy armıan ultynyń ókili Ismaǵulovtan eki saty joǵary tur. Onyń kórsetkishi – 21 kezdesý, 18 jeńis, 12 nokaýt. Bir aıta keterligi, bul eki sportshynyń da menedjeri bir. Ol – qazaq jigiti Saıat Abdrahmanov.
Dál sol týrnırde qazaqstandyq Sergeı Morozov pen Qytaıda týyp-ósken qandasymyz Qaısar Maqsat ta óz ónerlerin ortaǵa salady. 33 jastaǵy Sergeı –Aqtóbe oblysynyń týmasy. Byltyr ol Islam dinin qabyldap, namazǵa jyǵyldy. О́ziniń sporttyq mansabynda 23 ret oktagonǵa shyqqan otandasymyz 18 ret basymdyq tanytyp, 11 básekeni merziminen buryn aıaqtady. Las-Vegasta Morozov óziniń qurdasy, AQSh-tyń apaıtósi Djýrnı Nıýsonmen (10-3-0-1) aıqasady. Al 22 jastaǵy Qaısar sporttyń osy túrin serik etkeli beri 10 kezdesý ótkizip, sonyń bireýinde ǵana utyldy. Bıyl UFC-ge qabyldanǵan ol jaz aıynda amerıkalyq Stıv Garsııany uryp jyqqan edi. Endi ol 28 jastaǵy Meksıkanyń marqasqasy Rafa Garsııamen (13-3) sheberlik baıqasady.
Al olardan buryn muhıttyń arǵy jaǵalaýynda Jalǵas Jumaǵulov (14-7) óziniń kezekti jekpe-jegin ótkizedi. Ol osy aptanyń aıaǵynda Las-Vegasta judyryqtasady. Jalǵas úshin qazir óte jaýapty sát. 34 jastaǵy qazaq sportshysy álemniń eń beldi promoýshenimen kelisimshartqa otyrǵaly beri bes básekeniń tórteýinde utyldy. Bul joly ol 31 jastaǵy amerıkalyq Charlz Djonsondy (11-3) qalaı da utýy kerek. Eger Jumaǵulov jeńiletin bolsa, onda qandasymyz úshin bul UFC-degi sońǵy jarys bolýy múmkin.
23 jeltoqsanda Máskeýde ótetin ASA týrnıri de kópshiliktiń qyzyǵýshylyǵyn týdyrýda. О́ıtkeni júlde qory shamamen
1 mln AQSh dollaryn quraıtyn jarysta «Alash Praıdtyń» faıteri, 30 jastaǵy Artem Reznıkov (23-6) kúsh synasady. Qatarynan toǵyz básekede basymdyq tanytqan Shyǵys Qazaqstan oblysyndaǵy Rıdder qalasynyń týmasy jeńil salmaqtylar arasynda atalǵan jarystyń Gran-prı dodasynyń jartylaı fınalyna shyqty. Endi Reznıkov reseılik Andreı Koshkınmen (22-8) aıqasady. Eger ony ótse, fınalǵa shyǵady. Sheshýshi aıqasta Artemdi Reseıdiń taǵy bir ókili Edýard Vartanıan kútip tur.
Dańqy jer jarǵan aralas jekpe-jektiń has sheberi Habıb Nýrmagomedov qurǵan Eagle FC lıgasynyń kezekti jarysy 10 jeltoqsanda Almatyda uıymdastyrylady. Sol keshte Dáýren Ermekov (15-5) Farıdýn Odılovpen (14-2-2) aıqasady. Birden aıta keteıik, Tájikstannyń sportshysy óte qarýly. Buǵan deıin biz UFC-degi qazaqtyń basty juldyzy Shavqat Rahmonovtyń oktagonda 16 kezdesý ótkizip, barlyǵynda aıqyn basymdyqpen jeńiske jetkeni jaıynda talaı ret jazdyq. Barlyǵy da bastapqy kezeńderde utyldy. Onymen úshinshi raýndqa deıin aıqasýǵa tek bir sportshynyń ǵana kúsh-jigeri jetti. Ol dál osy Odılov. Osydan tórt jyl buryn Astanada ótken jarysta Farıdýn bizdiń Shavqatty biraz ábigerge salǵan edi. Tipti uryp qulatýǵa da shaq qaldy. Desek te óziniń ójettiginiń arqasynda Rahmonov sol básekeni óz paıdasyna sheshken-tin. Endi tájiktiń tarlany qazaqtyń taǵy bir qaısar uly Ermekpen «tiresedi». 30 jastaǵy Odılovtyń sambodan Azııa chempıonatynyń kúmis júldegeri, jabyq ǵımarattaǵy Azııa oıyndarynyń qola júldegeri degen ataqtary bar. Sondaı-aq ol – Eagle FC-nyń orta salmaqtaǵy chempıondyq belbeýiniń ıegeri.
Sonymen qatar 26 qarashada Indonezııanyń Balı aralynda ótetin BRAVE CF jarysyndaǵy Asý Almabaev (16-2) pen bahreındik Magomed Idrısovtiń (6-0) jáne 2 jeltoqsanda Tatarstannyń Almetevsk qalasynda tusaýy kesiletin Eagle FC týrnırindegi Rýslan Sarıev (13-1) pen reseılik Ramazan Amaevtyń (7-1) arasyndaǵy jekpe-jekterdi de jankúıerler taǵatsyzdana kútýde. Bul básekelerde atalǵan uıymdardyń altyn belbeýleri sarapqa salynady. Olardan bólek, otandyq «Alash Praıd» jáne «Naıza» promoýshenderi de respýblıkamyzdyń birqatar aımaqtarynda qyzyqty jarystar uıymdastyrýdy kózdep otyr.
