Bul ıdeıa oǵan qaıdan keldi deısiz ǵoı!? Árıne, balalarynan. Ár balanyń talǵamy ártúrli. Gúlnaz hanym perzentteriniń tilegin qalys qaldyrmaı, otaǵasy ekeýi ul-qyzdaryna barlyq jaǵdaıdy jasaýǵa tyrysady. Olardyń qalaýyn oryndaý úshin tańsáriden alýan túrli taǵamdar men táttiler pisirýge ádettengen. Keıin qyzdary qolǵabys etýge jaraǵan soń, úı ishinde jeńil-jelpi taǵamdar ázirlep satýdy qolǵa alady. Qyzyǵy, birte-birte dámdi tamaqtar eldiń qyzyǵýshylyǵyn tanytyp, suranys kóbeıe bastaǵan. Tutynýshylar til úıirer as jasaǵan anaǵa alǵysyn jaýdyryp, muny kásip retinde iske asyrýdy suraıdy. Eldiń tilegi boıynsha keıipkerimiz otbasymen aqyldasa kele, jeke bıznesin ashýǵa bel baılaıdy. Úlken qalalarda jumys istep tájirıbe jınaǵan stýdent balalary jappaı keń taralǵan kásip túrinen góri Saryózekte qaı bıznes túri kemshin, soǵan basymdyq bergendi durys sanaǵan. Osylaısha, kofe daıyndaıtyn shaǵyn dámhana ashýǵa bekinedi. Bul rette kópbalaly otbasyǵa memleket te kómek qolyn sozady.
«Alǵashynda aýdandyq jumyspen qamtý ortalyǵyna júgindim. Sosyn «Atameken» kásipkerler palatasynyń jergilikti fılıalynyń «Bastaý-Bıznes» baǵdarlamasy arqyly kásipkerliktiń qyr-syryn oqyp úırendim. Bıznes-jospar jasaýǵa biraz ýaqytym ketti, oǵan balalarym kómektesti. Jobamdy qorǵap, 1,2 mln teńge grant aldym. Bul qarajatqa dámhanaǵa qajetti ústel-oryndyq, tońazytqysh, termostat, taǵy basqa da jabdyqtar satyp aldym», deıdi kópbalaly ana. Ol oılaǵan maqsatyna jetý úshin barlyq qam-qareketti jasaǵan.
Kishkentaı balalaryn ertip júrip, «Coffeevita» JK-syn quryp, aýdan ortalyǵynan alǵash bolyp kofehana ashady. Dámhana taýarlaryn tutynýshylarǵa jyldam jetkizip beretin qyzmet túrin engizedi. Jumyla kótergen júk jeńil degendeı, kásipti júrgizýde negizgi jaýapkershilik Gúlnazdyń moınynda bolǵanymen, balalary da shama-sharqynsha járdemdesip júr. Al otaǵasy jetkizý qyzmetiniń mindetin ózi atqarady. Bul bir otbasylyq tandem sekildi.
Syrty shaǵyn kofehana bolǵanymen munda tamaq máziri mol. Onyń ústine Saryózektiń ishimen ótetin negizgi jol – B.Momyshuly kóshesiniń boıynda ornalasqan. Bul jol oblystyq mańyzy bar basty baǵyt bolǵandyqtan kelýshi úzilmeıdi dese de bolady. Kásipkerdiń aıtýynsha, kúnine kem degende jıyrmadan astam adam keledi. Shynymen kofehananyń assortımenti baı. Mundaǵy quımaq, toqash, bálish, baýyrsaq, pahlava, rogalık, basqa da taǵamdardyń bárin Gúlnaz ózi pisiredi. Degenmen joǵary synypta oqıtyn qyzdary da sabaqtan bosaǵan ýaqytynda anasyna kómektesedi. «Ásirese úlken toılarǵa, otbasylyq qýanyshtarǵa tapsyrys alǵan kezde balalardyń kómeginsiz atqarý qıyn. Sondyqtan balalarym – qolǵanatym», deıdi ózi. Ázirge úlken torttardy ǵana Taldyqorǵannan tapsyryspen alǵyzady. Mundaı táttini pisirýge qoıylatyn talǵam men talaptyń údesinen shyǵý úshin Gúlnaz ben onyń qyzdary ózderiniń aspazdyq qabiletterin damytyp, úırený ústinde.
Munda kofe men shaıdyń túri kóp, sondaı-aq ádettegi qara shaı, sútti jáne kók shaı da tabylady. Baǵalary 200-1 100 teńge aralyǵynda, bul jergilikti turǵyndar úshin qolaıly baǵa, ony klıentterdiń ózderi de rastaıdy.
«Jańa kofehana jol ústinde ornalasqandyqtan bizge óte yńǵaıly. Qajet kezde júgirip kelip, kofeni ózińizben birge alyp kete alasyz. Jalpy, Saryózekte mundaı qyzmet kórsetetin oryn ázirge osy jer ǵana jáne baǵasy da kóńilden shyǵady. Kofehana qojaıynynyń tabysty bolýyna tilektespin», deıdi jas maman Ásem Kenjebekova.
12 orynǵa arnalǵan shaǵyn dámhananyń jumys istep turǵanyna bir aıdan asty. Nıet bildirýshiler «WhatsApp» messendjeri arqyly jáne «gulnaz_coffe_saryozek» Instagram paraqshasy arqyly ónimderge tapsyrys beredi.
«Bári oılaǵanymyzdaı bolyp, osy qarqynda jumys istesek, aldaǵy ýaqytta kásibimizdi keńeıtý de oıymyzda bar. Ol úshin áleýmettik jobalarǵa arnalǵan 5 mln teńgeniń grantyn jeńip alýǵa bar kúsh-jigerimdi jumsaýǵa bel baılap otyrmyn. Pıssa, doner, grılde pisken taýyq sııaqty taǵamdar daıyndaýǵa da den qoısaq deımin. Ázirge eki adamdy jumyspen qamtyp otyrmyn. Eger irgemizdi keńeıtip jatsaq, jumysshylar qataryn da kóbeıtý josparda bar», deıdi G.Shákenova.
Jalpy, joldasy Sársenbaı Sádýaqasov ekeýi 14 bala tárbıelep ósirip otyr. Úlkenderi 27 jasta, kishisi Nurǵalym 1 jastan 8 aı ǵana asqan. Úlken úsh qyz turmys quryp úlgergen. Eki balasy stýdent, beseýi mektepte oqıdy, sońǵy úsh kishkentaıy balabaqshaǵa barady. Kópbalaly bolýdyń artyqshylyǵy kóp. «Qudaı, osy qýanyshymyzdan aıyrmasyn» deıdi keıipkerimiz.
«Aýyrlyqqa sabyr qylsań, jaqsylyqqa nıettenseń, eńbektenseń, qıyndyqtyń bárin jeńýge bolady. Balalarym – baılyǵym. Joldasym ekeýmiz 10 qyz, 4 ul tárbıelep otyrmyz. Olardy eshqashan kópsinbeımiz. Aldy er jetkende keıingilerin ósirýge járdemdesedi, bir-birine qaraıdy, bir-birin oqytady, sol jaǵy ata-anaǵa úlken kómek. Kópbalaly bolý negizi naǵashy jaqtan tegimizde bar. Úlken naǵashy ájem 18 qursaq kótergen eken, al naǵashy ájem 15 bala, sheshem 12 bala dúnıege ákelgen. Sol joldy jalǵastyrdym desem bolady. Úlken otbasy bolýdyń qıyndyǵy ǵana emes, óz artyqshylyqtary da bar. Otaǵasy Sársenbaı – meniń tiregim, balalarym – boıymdaǵy bar qabilet-múmkindikterimdi ashqan yntalandyrýshylarym, bári birge isimdi ilgeriletýge kómektesip keledi. Shańyraqta eń bastysy ózara túsinistik, syılastyq, bir-birine degen janashyr júrek, meıirimdi peıil bolsa, barlyq ıgilik ózi-aq úıirilip turady. Otbasynyń baqyty bar jerde, ómiri berekeli bolsa, adam tez qartaımaıdy. Biraq osy jetkenimizge toqmeıilsip otyrmaımyz. Jańa mashyqqa úırenip, ózimizdi damyta beremiz. Memleket bizdi barynsha qoldap keledi. «Altyn alqa» ıegerimin. 2019 jyly turǵyn úı kezegimen kóp bólmeli jeke úı berdi. Úsh balamnyń bireýi balabaqshaǵa tegin baryp júr. Sondyqtan osynyń bárine shúkirshilik etemin, budan ári de alǵa qaraı talpyna beremiz dep oılaımyn», deıdi ol.
Jetisý oblysy ákiminiń baspasóz qyzmetiniń málimetinshe, 2021-2022 jyldarǵa arnalǵan kásipkerlikti damytýdyń Ulttyq jobasy aıasynda jańa bıznes-ıdeıalardy iske asyrý úshin 2022 jylǵa Kerbulaq aýdanynda 89 mln teńgeden astam somaǵa memlekettik grant berý josparlanǵan. Búginde 40 adam, onyń ishinde 14 jas kásipker jáne halyqtyń áleýmettik osal toptarynan 26 azamat 40 mln teńge aldy. Jyl sońyna deıin taǵy 33 azamatqa óteýsiz granttar beriledi. Grant alǵandar qyzmet kórsetý, mal sharýashylyǵy, omartashylyq, kirpish óndirý, kondıterlik buıymdar daıyndaý jáne t.b. salalarda óz isterin ashýda. Aýdanda shaǵyn, orta bıznes obektileriniń sany 3 410-ǵa jetti, olarda 5 796 adam jumys isteıdi. Osy jyldyń 9 aıynda aýdanda 1 mlrd 900 mln teńgeniń ónimi óndirilgen.
Al óńirde bıyl qańtar-qyrkúıek aılarynda jumys istep turǵan ShOB sýbektileriniń sany – 46,5 myń. I toqsannyń málimetterine qaraǵanda, osy sektorda 84,5 myń adam jumyspen qamtylǵan. Bul rette atalǵan kezeńde oblysta ónim shyǵarý kólemi byltyrmen salystyrǵanda 88 paıyzǵa ósim kórsetip, 135,4 mlrd teńgeni qurap otyr. Sonymen qatar kásipkerlikti damytýdyń Ulttyq jobasy sheńberinde 2022 jylǵa 6,3 mlrd teńge bólingen. Búginde 25,4 mlrd teńge kredıttik somaǵa 253 joba maquldandy.
Jetisý oblysy
