Jańa teatr jan jadyratady

Teatrdyń ashylý saltanatyna Astanadan Mádenıet jáne sport mınıstri Dáýren Abaev, Qazaq ulttyq óner ýnı­versıtetiniń rektory, Qa­zaqstannyń Eńbek Eri Aı­man Musaqojaeva, general-leıtenant Abaı Tasbolatov, Dúnıe­júzilik Kann kıno fes­tıvaliniń laýreaty Samal Es­lámova, Májilis depýtaty Ja­narbek Áshimjan arnaıy keldi.

Saltanatty keshti ashqan oblys ákimi Qumar Aqsaqalov turǵyndardy jarqyraǵan sáý­letimen oblys ortalyǵyn bıik beleske kótergen óner osha­­ǵynyń ashylýymen qut­tyqtap, alǵashqy sózdi Dáýren Abaevqa berdi. Ol óziniń sózin Prezıdent Q.Toqaevtyń soltústikqazaqstandyqtardy osynaý tamasha óner ǵıma­ra­tynyń ashylýymen quttyq­taǵan hatyn oqyp berýden bas­tady. О́ziniń sózinde Qyzyl­jar óńiri sal-serilerdiń kıeli besigi ekenin aıta kelip, Segiz Seri, Birjan sal, Aqan seri, Maǵjan, Sábıt, Ǵabıt, Safýan sııaqty óner men ádebıet sańlaqtary shyqqan ólkeniń mádenıeti jańa bıikterge kóterilýin tiledi. Astanalyq qonaqtardyń bári de ózderiniń sózinde jańa teatrdyń ólke mádenıetin kóterýge úlken qyzmet etetinine senim bildirdi.

Bes júz kórermenge arnal­ǵan teatr ǵımaratynyń qu­rylysy 2018 jyly bastalyp, bir jylda aıaqtalýǵa tıis edi. Biraq jobaǵa birshama ózge­rister engizilip, onyń qury­lysy kesheýildep ketti. Qury­lysty jetildirip, sáýletin art­tyrýdy tikeleı oblys ákimi Qumar Aqsaqalov talap etkeni týraly «Egemen» buryn jazǵan bolatyn. Tapsyrys berýshi oblystyq ákimdik bol­ǵandyqtan teatrdyń sáýleti osy za­manǵy joǵary talapqa saı bolýy talap etilgen edi. Son­dyqtan jobaǵa kóp ózgeris osy tur­ǵyda engizilgen. Onyń ús­tine jaman indettiń órship tur­ǵan kezderinde tıisti qu­ry­lys materıaldary men teat­r jabdyqtary ýaqytynda jetkizilmedi. Qurylys jumys­tary osy sebeptermen uzap ketken.

Negizgi merdiger kompanııa IIM QAJ komıteti Tú­zetý mekemelerine jatatyn «Eńbek-О́skemen» kásiporny boldy. Qurylystyń jalpy quny 4,8 mlrd teńge shamasyn­­da, osynyń ishinde qural-jabdyqtar men basqa da shy­ǵyndar bar.

Jarqyraǵan teatrdyń jalpy aýdany 15,5 myń sharshy metr. Qalamyzda bu­ryn-sońdy mundaı sáýletti ǵıma­rat salynǵan emes. «Bul Qazaq­standaǵy eń ozyq arhı­tektýralyq jobamen salynǵan mýzykalyq-dramalyq teatr. Qyzyljarlyqtar úshin bul dúbirli de kúmbirli oqıǵa. Bul óńir rýhanııatynyń jedel damýyna áser eteri sózsiz», dedi jerlesimiz, belgili kompozıtor Jolaman Tursynbaev.

Teatrdyń ashylý saltanaty Sábıt Muqanovtyń «Aq­qan juldyz» romanynyń jelisimen jazylǵan «Shoqan» spek­­taklimen jalǵasty.