Árıne, kez kelgen túıtkildi sheshý úshin máseleniń baıybyna baryp, durys sheshim qabyldaý mańyzdy. Bul rette qurylysy toqtap turǵan nysandarǵa qatysty saýaldardy taldaý ákimdik janynan qurylǵan úlestik qurylys máseleleri jónindegi vedomstvoaralyq komıssııanyń quzyrynda ekenin aıta ketken lázim. Iаǵnı saqaldy qurylystardy zerdelep, sonyń ishinde sheshimi kúrdeli qurylys nysandaryn qarjylandyrýdy komıssııa naqtylaıdy.
«Elorda qurylys kompanııasy» seriktestigi iske kirisken tusta eń áýeli úleskerleri eń kóp «Shyǵys» jáne «Jaǵalaý» turǵyn úı keshenderinde qurylys-montajdaý jumystary qaıta jandandy. 2019 jyly elordadaǵy problemalyq qurylys nysandarynyń qatarynda 150-den asa úı bolǵan (16 myńǵa jýyq úlesker). Sol jyly 10 nysanda 13 úıdiń qurylysy aıaqtalyp, 2,5 myńnan asa úlesker kópten kútken páterin alǵan. Al 2020 jyldyń qorytyndysy boıynsha 14 nysandaǵy 20 úıdiń qurylysy aıaqtalyp, 3 myńǵa jýyq úleskerdiń máselesi sheshilgen. Ol ol ma, byltyr 57 úıdiń úleskerleri qonys toıyn toılaǵan. Naqtyraq aıtsaq, 7 myńnan asa otbasy kópten kútken páterin alǵan. Osy baǵyttaǵy oń jumystar bıyl da úzilmedi. Qazir elordada merzimi kesheýildegen 30 úıdiń qurylysy aıaqtalýǵa jaqyn. Endi kóp uzamaı sol úıler paıdalanýǵa berilse, onda taǵy 2 myń úlesker páter kiltin alady. «Elorda qurylys kompanııasy» JShS baspasóz qyzmetiniń aqparatyna súıensek, 2023-2024 jyldary taǵy 30 úıdiń qurylysyna qatysty sharýalar rettelse, 2 myń úleskerdiń máselesi sheshiledi.
Atalǵan kompanııa jergilikti ákimdikpen birlesip qurylysqa salynǵan memleket qarjysyn qaıtarýda da mańyzdy ról atqarýda. Aıta ketý kerek, ýákiletti uıym úleskerlerdiń máselesin sheshýmen shektelmeı, elorda halqynyń áleýmettik osal toptaryn turǵyn úımen qamtamasyz etýge kómektesip jatyr.
Osyǵan deıin Astana qalasynyń ákimi Altaı Kólginov qalalyq máslıhattyń kezekten tys sessııasynda qurylysy kesheýildegen nysandardyń qashan paıdalanýǵa beriletinin aıtqan edi.
«Bizdiń aldymyzda 16 myń úlesker otbasynyń máselesin sheshý mindeti turdy. Bul – jaı ǵana sandar emes, uzaq jyldar boıy jaldamaly páterlerdi aralap júrgen bizdiń turǵyndardyń taǵdyry. Olar burynda-aq óz úılerine kirýge tıis bolǵan. Bıyl qurylysy uzaqqa sozylǵan taǵy 30 kóppáterli turǵyn úıdi salyp bitirýdi josparlap otyrmyz. Uzaqqa sozylǵan qurylystardaǵy jumystyń aıaqtalýy – Memleket basshysynyń baqylaýynda. Jyl sońyna deıin aıaqtalatyn «saqaldy» qurylys sany 150-den 120-ny quraıdy, úleskerler sany 15 myń otbasydan 2 myń otbasyǵa deıin qysqarady. Soǵan qaramastan, taǵy 30 «saqaldy» qurylys qalyp otyr. Olardyń qurylysyn aıaqtaý boıynsha naqty josparlanǵan merzim bar», deıdi A.Kólginov.
Qarap otyrsaq, birer jyldyń ishinde Astana qalasynda «saqaldy» qurylystardyń sany eselep azaıǵan. Úleskerlerdiń máselesi de kezeń-kezeńimen sheshilýde. Mysaly, 70 jastan asqan qarııa Islam Qabdoluly jyldar boıy kútken páterine qol jetkizgenine dán rıza.
«2014 jyly sáýir aıynda «Shańyraq» turǵyn úı kesheniniń basshysymen kezdeskenimizde úı jarty jylda soǵylyp, paıdalanýǵa beriledi dep ýáde bergen edi. Sodan ne kerek, 2 bólmeli úıge 10 mln teńge aqsha aýdaryp, kúttik. Kúzge jettik. Úı joq. Kompanııa bankrot bolyp, biz syrt qaldyq. Keıin «Alǵa Samal» degen turǵyn úı qurylys kooperatıvin ashtyq. Sodan keıin úkimet aqsha bólip, «Elorda qurylys» kompanııasynyń kómegimen Nurǵısa Tilendıev kóshesindegi úıdi byltyr qarashada aldyq. Bul úıge kelgenimizge de jylǵa jýyqtady. Qazir kóńilimiz jaıly. Biraq segiz jyldaı jaldamaly páterde turyp sendeldik. Táýbe deımiz. Turǵyn úı máselesin sheshýde jerde qaldyrmaı járdemdesken Úkimetke, jergilikti ákimdik pen «Elorda qurylys kompanııasyna» alǵys zor», deıdi qarııa.
Astana qalasynda Islam Qabdoluly sekildi úıine jete almaı júrgen úleskerlerdiń azaıǵanyn joǵaryda keltirgen statıstıkalardan bile bersek bolady. Endeshe, jergilikti ákimdik pen Astana qurylys kompanııasy qolǵa alǵan jobalar jemisti bolsyn demekpiz.
