Murasy mol Mańǵystaý

Á.Kekilbaıuly atyndaǵy Mań­ǵystaý oblystyq tarıhı-ólketaný mý­zeıinde «Ejelgi Tetıs qupııalary» paleontologııalyq kórmesi ashylyp, kóz tartyp, kóńil tamsandyratyn nebir keremet jádigerler kópshilik nazaryna usynyldy. Mıllıondaǵan jyldar buryn tirshilik etken plezıozavrdyń jaq súıegi, ıhtıozavr, qazba tasbaqa qańqasynyń bólshekteri, ejelgi delfın súıekteri men akýlalardyń tisteri, ózge de qyzyqty eksponattar qoıylǵan kórmede ejelgi Tetıs muhıtynyń tú­binde ómir súrgen alyp baýyrmen jorǵalaýshy – elasmozavrdyń qaıta qurastyrylǵan qańqa súıegi basty jádiger boldy.

Mýzeıde sýretshi-qalpyna keltirýshi bolyp úsh jyldan beri qyzmet etip júrgen qyzmetker A.Bısembaevanyń aıtýynsha, paleontologter aldymen 850 mıllıon jyl buryn tirshilik etken janýardyń moıyn omyrtqasyn ǵana tapqan, uzyndyǵy 6 metrge sozylatyn ellasmozavrdyń tolyq qańqasyn qaıta qalpyna keltirý jumystary 5 aıǵa jýyq ýaqyt alǵan. MGÝ aspıranty, paleontolog N.Zverkovtiń baǵamdaýynsha, 2017 jyly Shetpe mańynan tabylǵan elasmozavr qań­qasynyń bir bólshegi dúnıe júzinde saqtalýy boıynsha tórtinshi orynda turǵan qundy jádiger. 2019 jyly re­seılik paleontologterdiń qazba ju­mystary nátıjesinde Sýly Qapy ma­ńynan ıhtıozavr qańqasy tabylǵan edi. Kórmede qazba nátıjesi – paleontologııa jańalyqtary kórermen nazaryna usynyldy.

Kórmeni tamashalaýshylar óz tań­danystaryn jasyra almady. Al áli dańǵyl jolǵa túsip kete almaǵan, biraq bolashaǵy zor ǵylym salasy sanalatyn paleontologııaǵa qyzyǵatyn jastar da az emes eken. Mektepte jú­rip-aq, Mańǵystaý dalasyna eks­kýr­sııaǵa shyǵyp, jetekshilerimen bir­ge qazba jumystaryna qatysatyn, óz jeke qoryna birneshe jádigerlerdi top­tastyryp úlgergen oqý­shylar da bar. Mańǵystaý oblystyq tarıhı-ólke­taný mýzeıi atalǵan kórme arqyly óz ke­lýshilerine taǵylymdy shara, kóterińki kóńil, rýhanı kesh syılaı aldy.

Mańǵystaý oblysy