Astanada «Eńbek joly» konkýrsynyń jeńimpazdary marapattaldy

Atalǵan konkýrs jyl saıyn Eńbek jáne halyqty áleýmettik qorǵaý mınıstrliginiń bastamasymen uıymdastyrylyp, eńbek adamdarynyń jumysyn nasıhattaý maqsatynda «Úzdik eńbek áýleti», «Jumys isteıtin jastardyń úzdik tálimgeri» jáne «О́ndiristiń úzdik jas mamany» atty nomınasııalary boıynsha marapattalady.

Is-sharaǵa Eńbek jáne halyqty áleýmettik qorǵaý mınıstri Tamara Dúısenova, memlekettik organnyń, «Atameken» UKP-nyń, respýblıkalyq jumysshylar men jumys berýshiler birlestikteriniń, jergilikti memlekettik organdardyń, áleýmettik seriktesterdiń ókilderi, eńbek ardagerleri men konkýrs jeńimpazdary qatysty. 

Marapattaý rásimi aldynda ashyq talqylaý sessııasy ótip, shara barysynda «Qazaqstannyń Eńbek Eri» ataǵynyń ıegerleri Serik Aqshýlakov, Aıakúl Mırazova men Ryshat Amrenovtar elimizdiń ár óńirinen kelgen jastarǵa eńbek tájirıbelerimen bólisip, suraqtaryna jaýap berdi.

Tamara Dúısenova saltanatty sharanyń ashylýynda eńbek adamdarynyń memleket pen qoǵamnyń damýyna qosyp jatqan úlesterin erekshe atap ótti.

«Memleket basshysy óziniń Qazaqstan halqyna Joldaýynda atap ótkendeı, eńbekqor azamattar, óz isiniń naǵyz kásipqoılary bizdiń memleketimizdi nyǵaıtady. Sondyqtan bizdiń qoǵamda kásipqoılyq pen eńbekqorlyqtyń joǵary baǵalanýy mańyzdy.

Bıyl 500-den astam qyzmetker «Eńbek joly» respýblıkalyq baıqaýyna qatysty, ol úsh nomınasııadan turady: «Úzdik eńbek áýleti», «Jumys isteıtin jastardyń úzdik tálimgeri», «О́ndiristiń úzdik jas mamany».

Eńbek áýletteri – bul mamandyqqa degen adaldyqtyń, joǵary jumys sheberliginiń, urpaqtardyń otbasylyq eńbek erliginiń sımvoly. Eńbek áýletteri  kompanııanyń berik irgetasyn qalaıdy, korporatıvtik rýhty nyǵaıtady.

Tálimgerlerdiń arqasynda jas qyzmetkerler kómek pen keńes alady, sonymen qatar olardyń daǵdylaryn jetildirýde ǵana emes, áleýmettený men ósýde de qajetti qoldaý alady.

Jastar jáne suranysqa ıe mamandar – Qazaqstannyń damýy men básekege qabilettiliginiń kilti. Biz óz tarapymyzdan jastarǵa barynsha qoldaý kórsetýimiz kerek.

Ardagerlerimizge erekshe qurmet bildirgim kelip tur. Ol kisiler naǵyz tálimgerlik ınstıtýtynyń rýhyn kóterýde jáne búgin de sizder kásibı jáne adamgershilik tájirıbelerińizdi jas mamandarmen bólisip, olardy eńbekke, jumysshy mamandyqtarǵa degen súıispenshilikti oıatyp, Otanǵa degen joǵary patrıotızmdi tárbıeleýdesizder.

Búgin marapattalǵan eńbek ardageri men «Eńbek joly» respýblıkalyq baıqaýynyń jeńimpazdary osy ataqtaryn maqtan tutyp júredi dep oılaımyn», dedi Tamara Dúısenova.

Mınıstr «Eńbek ardageri» medaldaryn eńbek ardagerleri Janargúl Magýlovaǵa, Kabdýlman Imambekovke jáne Kúnimbala Baıahmetbaevaǵa tapsyrdy.

Bıyl «Eńbek joly» konkýrsyna úmitkerlerden ótinimderdi qabyldaý 1 sáýirden bastaldy. «Úzdik eńbek áýleti» nomınasııasyna 163 ótinim, «Jumys isteıtin jastardyń úzdik tálimgeri» nomınasııasyna 179 ótinim, al «О́ndiristiń úzdik jas mamany» nomınasııasyna 180 ótinim kelip tústi. 

Konkýrstyń laýreattary respýblıkalyq komıssııanyń otyrysynda jarystyń aımaqtyq kezeńinde jeńimpaz atanǵandardan irikteldi. Komıssııa quramyna Eńbek jáne halyqty áleýmettik qorǵaý mınıstrliginiń ókilderi, Parlament depýtattary, áleýmettik seriktester, «Atameken» UQP men Aqparat jáne qoǵamdyq damý mınıstrliginiń «Qoǵamdyq kelisim» RMM ókilderi kirdi.

«Úzdik eńbek áýleti» nomınasııasy boıynsha Abaı oblysynyń Týkýbaevtar áýleti jeńimpaz atandy. Ekinshi oryndy Shyǵys Qazaqstan oblysynyń Kovalevtar áýleti, al úshinshi oryndy Ulytaýlyq Bekmaǵanbetovtar áýleti qanjyǵasyna baılady.

Jumys isteıtin jastardyń úzdik tálimgeri ataǵyn Almatydan kelgen Lıýdmıla Hvostova ıelense, ekinshi jáne úshinshi oryndy Erǵazy Turlybekov (Qaraǵandy oblysy) pen Jumabaı Abdýlov (Atyraý oblysy) aldy.

О́ndiristiń úzdik jas mamandary ataǵyn: Naýryzbek Daken Pavlodar oblysy (1 oryn), Sultan Áýken Almaty  oblysy (2 oryn) jáne Nurqasym Baıshýaqov Aqmola oblysy (3 oryn) ıelendi.

Konkýrs jeńimpazdaryna aqshalaı sertıfıkattar tabystaldy: 1 orynǵa – 1 mln teńge, 2 orynǵa – 500 myń teńge jáne 3 orynǵa – 300 myń teńge.

Eńbek jáne halyqty áleýmettik qorǵaý mınıstrligi 2016 jyldan beri eńbek áýletteri men óndiris jumysshylarynyń arasynda «Eńbek Joly» respýblıkalyq konkýrsyn uıymdastyryp keledi. Onyń basty mindeti – eńbek adamdary jaıly oń qoǵamdyq pikir qalyptastyrý jáne kásiporyndar men mekemelerde jańa eńbek áýletteriniń qalyptasýyna jaǵdaı jasaý.