О́tken aptanyń aıaǵynda osy oqý ornynyń ujymy mekteptiń shırek ǵasyrlyq toıyn tamasha konserttik baǵdarlamamen atap ótti. Oǵan Almatydan, Astanadan elimizge tanymal óner qaıratkerleri keldi. Sonyń ishinde ataqty skrıpkashy, Monte-Karlodaǵy halyqaralyq festıvaldiń jeńimpazy, Ermek Serkebaevtyń inisi, dırıjer Murat Serkebaevtyń qyzy Jámılá Serkebaeva, opera ánshisi, Qazaq Ulttyq óner ýnıversıtetiniń professory Qanat Omarbaev, opera ánshisi, Qazaqstannyń eńbek sińirgen qaıratkeri Azamat Jyltyrkózev jáne osy oqý ornynyń ataqty túlekteri qatysty.
О́ner ujymyn jergilikti bılik organdarynyń ókilderi, kelgen qonaqtar, mádenıet jáne oqý oryndarynyń ókilderi quttyqtap bolǵan soń, mektep oqýshylary tamasha qoıylym kórsetti. Sonyń ishinde Ermek Serkebaevtyń ómirine arnalǵan qyzyqty kórinister, ánshiniń balalyq shaǵyndaǵy ákesi Bekmuhamed pen anasy Zylıhanyń qara shańyraǵyndaǵy ósken ortasy, úlgi alǵan ónegeleri kórermenderge tartý etildi. Ánshiniń balalyq shaǵyn J.Bolat, eresek shaǵyn B.Birimjanov oınady.
Kezinde ataǵy jer jarǵan «Nash mılyı doktor» fılmindegi «Nado mnoı nebo sınee» sııaqty ánshiniń oryndaýyndaǵy ánder shyrqalyp, olar oqýshylardyń qoıylymdarymen árlendirilip otyrdy. Balalar hory oryndaǵan «О́z elim», «Narısýı etot mır», «Allılýııa» sekildi ánder de kórermenderdi beıjaı qaldyrmady. Basqa ónerpaz jastar da ónerdiń órine aıaq basyp turǵandaryn kórsetti. Bul shańyraqtyń óner jolyndaǵy alar asýlary bıik ekeni kórinip tur.
Sonymen qatar óner ujymyn beınekórinis arqyly Álibek Dinishev, Aıman Musaqojaeva sııaqty óner juldyzdary da quttyqtady.
PETROPAVL
