153 túlek Reseıde oqıdy

Eýrazııalyq ekonomıkalyq odaq sheńberinde talaı dúnıeni iske asyrýǵa bolady. Bul tek saýda-sattyq jasap, taýarlaryńdy syrtqa shyǵaryp, paıda tabý ǵana emes. Sonymen qatar, bilim jetildirip, tájirıbe almasyp, ozyq dúnıelerin ıgerip, óz ómirimizge dendep engizip, damýdyń dańǵylyn keńeıtý bolsa kerek. Osy turǵydan alǵanda Qyzylorda oblysy alǵashqy jumystardy bastap ketti. Sebebi, qyzylordalyq 153 túlek Máskeýde bilim alǵaly jatyr. Qyzylordaǵa Máskeý ulttyq tehno­logııalyq zertteý ýnıversıtetinen ar­naıy komıssııa kelip, 643 mektep bitirýshiden emtıhan qabyldady. Aıta keteıik, oblys ákimi Qyrymbek Kósherbaevtyń bastamasymen atalǵan oqý ornymen buǵan deıin áriptestik baılanys ornatylǵan. Synaqty sátti tapsyrǵan 153 oqýshy reseılikter taǵaıyndaǵan granttardy ıelendi. Jerlesterimizdiń basym bóligi metallýrgııa, nanotehnologııa sekildi mamandyqtardy tańdap otyr. Bul da sebepsiz emes. О́ıtkeni, aımaqta metallýrgııa salasyn damytý qolǵa alynyp jatqany belgili. Al atalǵan salany damytý úshin mamandar qajet. Árıne, mamandy syrttan shaqyrýǵa da bolar edi. Biraq óz balańdy oqytyp, odan myqty jasap, el ıgiligine jumsaǵannyń rahaty da bólek qoı. Mine, búgin oqýǵa túsken balalar tórt jyldan soń Qyzylorda oblysyndaǵy metallýrgııa salasyn jandandyrýǵa jigerlene kirisetin bolady. Al oǵan deıin olar Germanııa, AQSh, Fransııa memleketterinde is-tájirıbeden ótip kelmek. Erjan BAITILES, «Egemen Qazaqstan». QYZYLORDA.