«Sent-Endrıýs (SAFF) – halyqaralyq kınofestıval. Bul Shotlandııa men búkil álem boıynsha kıno salasyndaǵy talanttardyń esimderi belgili bolatyn aıtýly shara. «Muqaǵalı» kórkem fılmi bir jylda 10 halyqaralyq syılyqqa ıe boldy. Bul buryn-sondy bolmaǵan úlken qýanyshty jańalyq. Barsha qazaq kınosyn qadirleıtin kórermenge alǵysymdy bildiremin. Qazaqtyń uly aqyny ulyqtalǵan fılm jastarǵa tek shabyt bersin. Táýelsizdik kúni qarsańynda álemniń beldi synshylary óz baǵasyn bergen «Muqaǵalı» fılmine berilgen bul júldeler – qazaq halqynyń ortaq jeńisi!», dedi fılmniń rejısseri Bolat Qalymbetov.
Belgili qazaq aqyny Muqaǵalı Maqataevtyń 90 jyldyǵyna arnalǵan «Muqaǵalı» kartınasy onyń ómiriniń sońǵy jyldary týraly baıandaıdy. Fılmdi Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirdi.
Qazaqstandyq prokatqa fılm 2021 jyldyń 21 qazanynda shyqqan bolatyn. Fılmniń álemdik premerasy 25-shi (PÖFF) Tallın kınofestıvali aıasynda ótti. Onda qazaqstandyq kartına ekýmenıkalyq qazylar alqasynyń júldesine ıe boldy.
Aıta keteıik, osy jyldyń naýryz aıynda ómirbaıandyq kartına Keraladaǵy (Úndistan) 26-shy Halyqaralyq kınofestıvaldiń «Álemdik kıno» seksııasynda usynyldy. Qyrkúıek aıynyń basynda «Muqaǵalı» fılmi Qazan kınofestıvalinde qazylar alqasynyń arnaıy júldesine ıe boldy. Sondaı-aq fılm Gatchınadaǵy (Reseı) «Ádebıet jáne kıno» Halyqaralyq kınofestıvalinde qoıýshy-sýretshi Ermek О́tegenovtyń úzdik jumysy úshin qazylar alqasynyń arnaıy dıplomyna ıe boldy. Qazan aıynda fılm Dýbaıdaǵy META Film Fest kınofestıvalinde 70-ten astam fılm ishinen bas júldege ıe boldy.
